Өнөөдөр болсон “Зэрлэг цэцэгсийн хүлэмж” киноны тухай хэвлэлийн бага хурлын үеэр залуу жүжигчин А.Ганчимэгтэй хэдэн хором ярилцлаа.

-Энэ кинонд ямар дүр бүтээв? Дүрийнхээ онцлогоос ярьж өгөхгүй юу?
-Миний хувьд энэ кинонд халаасны хулгайч Жоохоноогийн дүрд дээр ажилласан. Зөвхөн миний дүр гэлтгүй манай кинонд гарч байгаа бүх эмэгтэй дүрүүдийн онцлог гэвэл хүн чанар гэж юу болох, хүний гоо сайхан гаднаа байдаг уу, дотроо байдаг уу? гэдгийг харуулахыг зорьсон. Гэтэл өнөөдөр хүмүүс хажуугаар зөрж өнгөрсөн хүнээ зөвхөн гадаад байдлаар нь дүгнээд өнгөрч байна. Ингэж үнэлэлт дүгнэлт өгөх нь буруу шүү дээ.

-Халаасны хулгайч охины дүр бүтээхэд хэцүү байв уу? Судалгаа хэр хийсэн бэ?
-Манай киноны трейлер дээр гардаг амандаа хийсэн хурц иртэй зүйлээ гаргаж харуулдаг хэсэг байсан даа. Тэрийг хийхэд их эвгүй байсан. 1981 оны хулгайчдын тухай амандаа хурц иртэй зүйл авч явдаг, бүр түүгээрээ хүний нүдийг ч зүсдэг байсан гэх мэт янз бүрийн зүйл сонсогддог. Судлаад үзэхэд тэр бүхэн үнэн байсан. Тэд ихэвчлэн автобусан дотор хулгай хийдэг байсан юм байна лээ. Миний хулгай хийж байгаа хэсэг тийм ч олон биш. Ямар ч гэсэн хулгайчийн дүрийг гаргахыг хичээсэн. Мөн манай продакшны уран бүтээлчид бүгдээрээ ярилцаж байгаа бүх дүрүүдээ уран сайхны талаас нь үзүүлэхийг хичээсэн.

-Драмын театраас яагаад гарах болов оо? Хөөгдсөн гэх яриа их байна?
-Энэ тохиолдолд хөөгдсөн гэдэг үг надад тохирохгүй. Яагаад гэвэл УДЭТ уран бүтээлчидтэй жил жилээр гэрээ хийдэг. Түүнийгээ жил бүр сунгадаг. Гэрээ дууссан тохиолдолд Драмын театр, Ганчимэг хоёр ярилцаад гэрээгээ сунгах эсэхээ шийддэг. Мэдээж манай театр сайхан. Би театртаа олон уран бүтээл дээр хамтран ажилласан. Гэхдээ түүнээс илүүтэйгээр хувь хүн өөрийгөө яаж хөгжүүлэх вэ гэдгээ бодох хэрэгтэй. Дэлхий ертөнц маш хурдацтайгаар хөгжиж байгаа энэ цаг үед би нийгмээсээ хоцрохгүйгээр маш олон зүйлийг нэмж хиймээр байна. Ийм учраас түр хугацаагаар театраасаа хөндийрөөд, хоёр эгчтэйгээ нийлж хувийн уран бүтээлүүдийг хийе, олон зүйл гардаж хийж үзье гэсэн шийдвэр гаргасан. Энэ шийдвэрийнхээ дагуу театртай хийсэн гэрээгээ сунгаагүй. Энэ тухай хаанаас тийм мэдээлэл гарсныг мэдэхгүй. Хөөгдсөн  гэсэн мэдээлэл маш их гарсан байсан.

-Найз залуутайгаа хамтарч кинонд тоглоход ямар байсан бэ?
-Миний найз залуу Энхтүвшин гээд залуу байгаа. Солонгос улсад жүжигчний мэргэжилээр сурч төгссөн. Энхтүвшингийн хувьд энэ кино анхны уран бүтээл. Бид энэ кинонд хосууд болж тоглосон байгаа. Хамгийн сонирхолтой нь манай Энхтүвшин сэргийлэгч залуу, би хулгайч охин. 

-Ярилцсанд баярлалаа.