Бразилийн Рио-де-Жанейро хотноо өчигдөр эхэлсэн жүдо бөхийн 2013 оны насанд хүрэгчдийн дэлхийн аварга шалгаруулах тэмцээнээс монголын тамирчин дэлхийн аваргын алтан медалийн эзэн болжээ.

Тэмцээний хуваарийн дагуу эхний өдөр эмэгтэйчүүдийн 48 кг, эрэгтэйчүүдийн 60 кг-ын жингийн тамирчид өрсөлдсөн юм.
Эндээс 48 кг-д өрсөлдсөн ОУХМ М.Уранцэцэг жиндээ аваргалж дэлхийн аваргын алтан медаль, эрэгтэйчүүдийн 60 кг-ын жинд ОУХМ Д.Амартүвшин мөнгөн медаль хүртжээ. Ийнхүү алт мөнгөн медаль хүртсэнээр Монголын жүдочидбагийн нийлбэр дүнгээрээ энэ тэмцээнд оролцож байгаа нийт 123 орныг тэргүүлж байгаа юм.

Монголын жүдо бөхийн түүхэнд  анхны эмэгтэй дэлхийн аварга жүдоч болсон М.Уранцэцэг дэлхийн аваргын татамид 48 кг-ын жинд В хэсэгт сугалаа татаж, эхний тойрогт хийлж, хоёрдугаар тойргийн барилдаанд Украйны жүдоч Марина Кротыг цэвэр, дараагийн барилдаандаа Колумбын Эблин Лукумиг мөн цэвэр, улмаар Кубын тамирчин Мария Селия Лабордег дахин цэвэр ялснаар хэсгийн аварга болжээ.


Ингээд дараагийн барилдаанаа  Бразилийн жүдоч Сара Менезестэй хийж, олимпийн аварга тамирчныг нутгийнх нь дэвжээнд сөхрүүлснээр аваргын алтан медалийн төлөө өрсөлдөх эрхтэй болжээ. Аваргын төлөөх шийдвэрлэх барилдаанд М.Уранцэцэг 2010 оны дэлхийн аварга, Японы тамирчин Харуна Асамитай барилдаж, 2:18 минутад цэвэр ялж, Монголын спортын түүхэнд цоо шинэ хуудас нэмж, шинэ амжилтын эзэн боллоо.


Мөн энэ тэмцээнээс мөнгөн медаль хүртсэн ОУХМ Д.Амартүвшингийн хувьд БНАСАУ-ын тамирчин Ян Хьёк-Чол, Морокко улсын тамирчин Яссин Моудатир, Австрийн Людвиг Пайшер нарыг ялж, улмаар хэсгийн аварга төлөө нутгийн жүдоч Г.Болдбаатартай таарсан. Дэлхийн аваргын дэвжээнд учраа таарсан тэдний барилдаанд Д.Амартүвшин ялснаар хэсгийн аварга болжээ. Ингээд Д.Амартүвшин хагас шигшээ барилдаанд Гүржийн Амиран Папинашвилиг цэвэр ялж, аваргын төлөөх барилдаанд Японы жүдоч, 2009 оны өсвөрийн дэлхийн аварга Наохиса Такатод ялагдсанаар мөнгөн медалийн эзэн болжээ.