Энэ сарын 25-нд манай улсад “Дэ Жангум” киногоороо бидний танил болсон Солонгосын жүжигчин Ли Ён Э ирээд байсан. Тэрээр өнөөдөр зураг авалтын багынхны хамтаар нутаг буцаж байна.
Түүний ирсэн учрыг тодруулбал Солонгосын STS телевизийн Азийн орнуудын уламжлал хоолны тухай цуврал нэвтрүүлэг, баримтат киноны ажлаар Монголд ирсэн бөгөөд  энэ сарын 26, 27-ны өдрүүдэд буюу нэвтрүүлгийн зураг авалтыг хийсэн байна.
Жүжигчин Ли Ён Э хэлэхдээ “Монгол орон надад маш их таалагдаж байна. Биднийг байсан хоёр өдөр цаг агаар ч сайхан байлаа.  Хүй долоон худагт монгол үндэсний хувцастай хүүхдүүдтэй хамт зургаа авахуулсан шүү. Өнөөдөр бороо орж байна. Би бороонд маш их дуртай. Ялангуяа Монголын хөдөө  нутаг маш  их таалагдлаа. Тайван агаар нь ч гоё. Бидний энэ удаагийн аялал богинохон байсан ч Монгол орны тухай мэргэжил нэгтнүүддээ, ойр дотны хүмүүстэй ярьж өгөх болно” гэжээ. 
Сонирхуулахад  “Дэ Жангум” киноны хоёр дахь цувралыг гаргахаар уран бүтээлчид нь ярилцаж байгаа бөгөөд хуучин бүрэлдэхүүнээрээ тоглох тоглохгүй нь одоохондоо тодорхойгүй байгаа  гэнэ.