-“Норовын намтар” жүжгийн Норовын дүрд тоглохоор болжээ. Дүрийнхээ талаар яриач, энэ дүр хүүхдүүдэд юуг өгүүлэх бол?
-Норовын дүрд тоглох болсондоо үнэхээр баяртай байна. Бид Норовыг үндэсний хэмжээний баатар болгох гэж байгаа юм. Энэ жүжгийн зохиолыг  хоёр жилийн өмнөөс бичиж эхэлсэн. Тэр үеэс л манай найруулагч намайг тоглуулна гэж бодоод бичсэн гэсэн.

-Тэгэхээр энэ дүр анхнаасаа чамд зориулагдсан байжээ?
-Тийм ээ. Би ч багадаа их сахилагагүй, ер нь Норов шиг хүүхэд байсан даа.(Инээв) Тэгээд л намайг бүр анхнаасаа энэ дүрд тоглуулахаар сонгосон юм билээ.

-Чиний анхны дүр гэж сонслоо?
-Тийм ээ. Миний бие дааж бүтээж байгаа анхны гол дүр. Би 2009 онд СУИС-ийг жүжигчин найруулагч мэргэжлээр төгсөөд Драмын театрт гурав дахь жилдээ ажиллаж байна. Урд нь “Тэмүүжин” жүжигчт туслах дүр бүтээж байсан.

-Та нар энэ жүжгээрээ юу хэлэхийг хүссэн бэ?
-Эцэг эхчүүд ажил гэсээр үр хүүхэддээ анхаарал халамж тавихаа больсон, хүүхдүүд хайр халамжаар дутагддаг болсон. Хүүхдүүд PC тоглоомын газар донтдог, хичээл номоо умартдаг. Тэрнээс  шалтгаалаад олон сөрөг үзэгдэл бий болж байгааг хүүхэд, эцэг эхчүүдэд ойлгуулахыг л зорьж байна. Монголд байгаа бүх “Норов”-чуудын төлөөлөл болоод энэхүү тайзан дээр зогсож байна даа.

-Дараагийн уран бүтээлийн төлөвлөгөө юу байна?
-Мэдээж хийх ажил их байгаа. Бодсон санасан зүйлүүд их байна. Тэр болгоныг та бүхэнд тухайн үед нь хүргэж байх болно.

-Энэ жүжгийг хэр хугацаанд бэлдэв?
-Гуравдугаар сараас бэлтгэлээ хийж эхэлсэн. Тэгээд зургаадугаар сарын нэгэнд үзэгчдийн хүртээл болгох байсан боловч тодорхой шалтгааны улмаас хойшилж, есдүгээр сарын дөрөвнөөс анхны тоглолтоо хийх гэж байна. 

-Норовын дүрийг гаргах гэж хэр их зүтгэл гаргав. Хэцүү байсан уу?
-Хэцүү үедээ хэцүү л байлаа. Гэхдээ энэ том жүжигчидтэйгээ хамт тоглож байгаа болохоор их зүйл сурсан. Туршлага ч хуримтлуулж чадлаа.