Таван настай хүүгээ заазуурдаж хүнд гэмтээсэн эцгийг шүүх хурал  Баянзүрх дүүргийн шүүхийн танхимд хаалттай явагдаж байна. Хүүгийн эцэг Н.Довжинсүрэнг Эрүүгийн хуулийн 181.3, 100.1-т зааснаар хэрэг үүсгэж шалгасан бөгөөд, түүнд хүүгээ байнга зодсон буюу тарчлаасан, хүйтэн мэс хэрэглэж бусдын биед санаатай хүнд гэмтэл учруулсан хэрэгт буруутган эрүүгийн хэрэг үүсгэн, прокуророос яллаад байгаа юм.

Уг хэрэгт холбогдох шүүх хурал энэ сарын 23-нд болох байсан ч Н.Довжинсүрэнг өмгөөлөх өмгөөлөгч олдоогүй гэсэн үндэслэлээр өнөөдрийг хүртэл хойшлуулаад байсан. Тэгвэл өнөөдөр түүнийг өмгөөлөгчдийн холбооны өмгөөлөгч Цэцэгмаа өмгөөлж, шүүх хуралд оролцож байгаа аж. Харин хүүгийн өмгөөлөгчөөр Азжаргал ажиллаж байна.

Шүүхээс Н.Довжинсүрэнгийн гэм буруутайг нотолвол 6-10 жилийн хорих ял оноох юм. Хуралд даргалагч шүүгчээр Л.Ганзориг, улсын яллагчаар З.Оюундэлгэр, хохирогчоор таван настай хүү И болон түүний ээж О.Болормаа нар оролцох юм. Уг хурал нь насанд хүрээгүй хүүхэдтэй холбоотой учраас хаалттай хэлэлцэж байна.