УДЭТ-ын уран бүтээлчдийн бүтээл “Эцсийн зогсоол ба зөвхөн чи” жүжиг энэ сарын 15-нд нээлтээ хийхээр болсон билээ. Энэ жүжгийн ерөнхий найруулагчаар Улсын драмын эрдмийн театрын ерөнхий найруулагч Н.Наранбаатар ажиллаж байгаа бөгөөд У.Шекспирийн дараа бичигдэх сонгодог жүжгийн зохиолч хэмээн үнэлэгддэг Рэй Күнигийн зохиолоор жүжгийг тайзнаа амилуулж байгаа юм. Хамгийн сонирхолтой нь тун удахгүй олны хүртээл болох энэ жүжгийн клип дууны биш бүжгийн клип болсон гэнэ. Тус клипнээс жүжигчид хэрхэн бүжиглэдэгийг харж болно хэмээн жүжгийн найруулагч Н.Наранбаатар нэгэн ярилцлагадаа дурьджээ. “Эцсийн зогсоол ба зөвхөн чи” жүжиг найман дүртэй бөгөөд эмэгтэй гол дүрийн жүжигчин нь Ж.Оюундарь, эрэгтэй нь Л.Дэмидбаатар нар юм байна. Жүжигт нэгэн гэр бүлийн амьдрал, эхнэр, нөхрийн хууралт гэх мэт өнөөдрийн нийгэмд амьдарч байгаа хүмүүсийн мэдэх энгийн зүйлийн тухай өгүүлэх ч гүн агуулгаараа хүмүүсийн өөрчлөлтийг харуулна. Ер нь сонгодог жүжгийн зохиол нэг орон зайд 72 хүртлэх цагт багтан өрнөж байгаа үйл явдлыг харуулдгаараа онцлогтой. Энэ жүжиг нэг орон зайд 3-4 цаг үргэлжилнэ.
УДЭТ-ын ерөнхий найруулагч Н.Наранбаатар энэ жүжгийнхээ тухай ярихдаа “Орчин үеийн Франц, Английн зохиолыг бид монголчуудад үзүүлж байх хэрэгтэй юм байна. Өнөөдөр монголчууд бид хэтэрхий хэлбэрдээд аливаа зүйлийн агуулгыг анзаарахаа больжээ. Бүгд л үнэтэй брэнд хэрэглэж, жийп унаж, хэрэглэж чаддаггүй байсан ч хамаагүй хамгийн сүүлийн үеийн ухаалаг гар утас барихаар хошуурч байна. Эсвэл хамгийн үнэтэй торго, дурдангаар хийсэн чамин дээл, үнэт чулуун хөөрөг барих гэж өрсөлдөнө. Гэтэл энэ бол энгийн л хэрэглээ, нөгөө хэсэг нь бидний үндэсний уламжлал, бахархал шүү дээ. Энэ их хийрхлийг багасгахын тулд хүний оюун сэтгэлгээнд хандсан бүтээл хийх ёстой. Ийм учраас би энэ жүжгийг тавихыг хүссэн” гэжээ. Дашрамд дуулгахад энэ жүжгийн нээлттэй зэрэгцэн УДЭТ-ын уран бүтээлчид говийн аймгуудаар тоглох гэж байгаа. Ингэхдээ нэг хэсэг нь аялан тоглолтоо хийж нөгөө хэсэг нь “Эцсийн зогсоол ба зөвхөн чи” жүжигтээ тоглохоор болжээ. Аялан тоглолтоор явж байгаа уран бүтээлчид “Тамгагүй төр”, “Хайрын виз”, “Эхнэрээ зээлээч”, “Онц сурлагатнууд орохыг хориглоно” жүжгүүдийг Дорноговь, Дундговь, Өмнөговь аймгуудаар тоглохоор болсон байна. Мөн аялан тоглолтын багийг гавьяат жүжигчин Б.Жаргалсайхан ахалж байгаа бөгөөд тэд ирэх сарын 16-нд Улаанбаатраас хөдлөх юм.
