Эрүүл мэндийн сайдын 309 дүгээр тушаалаар энэ жилээс эхлэн жил бүрийн 9 дүгээр сарыг "Оюутны эрүүл мэндийг дэмжих сар" болгохоор шийдвэрлэсэн. Энэ аяныг зохион байгуулах ажлын хэсэг ЭМЯ, ХАХНХЯ, БШУЯ, НЭМГ, НҮБ-ын Хүн амын сан, МОХ зэрэг байгуулагуудын төлөөллүүдийг оролцуулан байгуулагдсан. Ажлын хэсгийн гишүүд өнөөдөр энэ нэг сарын хугацаанд хийж, хэрэгжүүлэх ажлынхаа талаар сэтгүүлчдэд мэдээлэл хийлээ.ЭМЯ-ны Бодлогын хэрэгжилтийг зохицуулах газрын дарга Я.Буянжаргал хэвлэлийн бага хурлыг нээж хэлсэн үгэндээ, “Оюутнуудын эрүүл мэндийг дэмжихийн тулд салбар байгууллагуудын хамтын ажиллагааг сайжруулах, ялангуяа эрүүл мэндийн салбар, иргэний бүртгэлийн байгууллага, эрүүл мэндийн даатгалын байгууллагатай хамтран оюутны эрүүл мэндийн төлөө хэрхэн ажиллах вэ гэдэгт энэхүү аяны гол зорилго оршиж байгаа юм. Мөн залуучуудыг аль болох эрүүл байлгах, тэднийг эрүүл зан үйлд төлөвшүүлэхэд чиглэж, мэдээлэл, сургалт сурталчилгааны чиглэлээр оюутны эрүүл мэндийн боловсролыг дээшлүүлэхэд илүү анхаарна” гэсэн юм.
"Оюутны эрүүл мэндийг дэмжих сар"-ын нээлтийг ирэх баасан гарагт буюу энэ сарын 6-ны өдөр Чингисийн талбайд зохион байгуулахаар болсон байна. Нээлтэд холбогдох яам, агентлагууд эмнэлэгийн байгууллагууд оролцохоос гадна их дээд сургуулиуд оролцох юм. Энэ үеэр оюутнуудад эрүүл мэндээ хэрхэн хамгаалах талаар сургалт, сурталчилгаа явуулж, эрүүл мэндийн даатгалд хамруулах, хараа шалгах, амны хөндийн үзлэг зөвлөгөөг өгөх, өндөр жин үзэх зэрэг олон үйл ажиллагаа зохиогдох аж. Энэ жилийн хувьд оюутнуудад эрүүл мэндээ хамгаалах талаар сургалт, сурталчилгаа явуулаад зогсохгүй оюутнуудыг эрүүл мэндийн даатгалд хамруулах ажлыг эрчимжүүлнэ гэдгээ ажлын хэсгийн гишүүд онцолсон. Оюутнууд эрүүл мэндийн даатгалд хамрагдсанаар жилдээ 1,328,000 төгрөгний эмнэлэгийн тусламж үйлчилгээг үнэ төлбөргүй авах эрхтэй байдаг ажээ. Мөн оюутнууд сайн дурын үүднээс нийгмийн даатгалд даатгуулах боломжтой байдаг байна.
Түүнчлэн хөдөө орон нутгаас хотод сурахаар ирсэн оюутнууд хаягын зөрчлөөс үүдэн улсын эмнэлэгүүдээр үйлчлүүлж чаддаггүй. Энэ байдлыг судалж үзснээр оюутнуудад түр оршин суугчдын бүртгэлд хамруулах ажлыг НЭМГ-аас эхлүүлэхээр болжээ. Ингэснээр хөдөө орон нутгийн оюутнууд түр оршин суугчын бүртгэл иргэний үнэмлэх даатгалын дэвтэр зэрэг бичиг баримтаараа харъяа дүүргийн эмнэлэг болон улсын эмнэлэгүүдээр үнэ төлбөргүй үйлчлүүлэнэ гэсэн үг.
Улсын хэмжээнд 99 их, дээд сургууль, коллежид нийт 175.591 оюутан суралцаж, байгаагаас 156.128 буюу 88.9% нь Улаанбаатар хотод суралцаж, 16.735 нь дотуур байранд амьдардаг. Нийт оюутнуудын 100.201 буюу 57% нь орон нутгийн харъяалалтай байна. Насны бүлгээр авч үзвэл 16-24 насныхан 145.563 буюу 82.9%, 25-34 насныхан 17.1% нь байна. Дэлхийн Эрүүл мэндийн байгууллагын тодорхойлолтоор 10-19 насныхныг "өсвөр үеийнхэн", 19-24 насныхныг “залуучууд” гэж үздэг. Эдгээр 16-34 насны залуучууд бол хүн амын харьцангуй эрүүл бүлэг боловч архаг эмгэгтэй хүмүүсийн 60% нь уг эмгэгийг өсвөр, залуу насандаа олдог ажээ. Ийнхүү оюутнуудын эрүүл мэндийн боловсрол дутмаг, нөхөн үржихүйн эрүүл мэндийн тулгамдсан асуудлууд, орон нутгийн харъяалалтай оюутнуудын хаягийн бүртгэл тодорхойгүй зэргээс хамаарч эрүүл мэндийн, эмнэлгийн тусламж, үйлчилгээ авах асуудал төвөгтэй байдгийг мэргэжилтнүүд хэлж байлаа.
НДЕГ-ын ЭМД-ын Бодлогын хэрэгжилтийн хэлтсийн дарга Ц.Ганцэцэг оюутнууд даатгалд хамрагдсанаар жилдээ 1 сая 328 мянган төгрөгтэй дүйцэх хэмжээний эрүүл мэндийн тусламж үйлчилгээний зардлыг даатгалын сангаас төлүүлэх эрхтэй гэдгийг онцолсон юм. Мөн тэрээр энэхүү аяны хүрээнд их, дээд сургуулиудтай хамтран оюутнуудыг ЭМД-д хамруулах ажлыг эрчимтэй зохион байгуулна гэдгээ илэрхийлсэн. НҮБ-ын ХАС-гийн НҮЭМ-ийн хөтөлбөрийн зөвлөх Х.Энхжаргал, “Аяны хүрээнд НҮБ-ын Хүн амын сангаас санхүүгийн дэмжлэг үзүүлэн, хамтран ажиллаж байгаадаа таатай байна” гээд анхаарал хандуулж байгаа гол чиглэл бол өсвөр насны охид, залуучуудын нөхөн үржихүйн эрүүл мэндийн асуудал байдаг. Оюутнууд бэлгийн идэвхтэй амьдралтай хүн амд багтдаг бөгөөд эцэг, эх асран хүмүүжүүлэгчдийн хараа хяналтаас холдож, бие даан амьдарч эхэлдэг учир өөрийн эрүүл мэндийг хамгаалах мэдлэг, чадвар, туршлага дутмаг, бэлгийн харьцаанд орох, хүсээгүй жирэмслэлт, үр хөндөлт болон бэлгийн замаар дамжих халдварт өвчинд өртөх нь түгээмэл байдаг. Өсвөр үеийнхний 15.2% нь тамхи татдаг, БЗДХ-аар өвчлөгсдийн 48 % нь 25-аас доош насныхан байдаг” гэдгийг тодотголоо хэмээн ЭМЯ-аас мэдээллээ.
