Уран нугараач Э.Цацрал шүдэн дээрээ биеийнхээ бүх жингээр тогтон нугардаг үзүүлбэрээр
Унгар улсын Будапешт хотод дөрвөн сарын өмнө болсон шалгаруулалтад оролцож хоёр минут 34 секунд шүдэн дээрээ тогтон Гиннесийн
номд бичигдээд байсан. Харин тэрээр өнгөрсөн
долдугаар сарын 26-нд Турк улсын Истанбул хотод болсон Гиннесийн дээд
амжилт бүртгэх нэвтрүүлэгт оролцож шүдэн дээрээ дөрвөн минут 17 секунд
тогтон өмнөх амжилтыг дахин эвджээ. Тэрээр дөрвөн настайдаа МУГЖ, Төрийн шагналт, уран нугараач Д.Мажигсүрэнд шавиар орж, нийт 20 жил уран нугаралтаар хичээллэж байгаа юм. 2004 оноос эхлэн олон улсын уран нугаралтын тэмцээнүүдэд амжилттай оролцож ирсэн бөгөөд 2010 онд Соёлын тэргүүний ажилтан болжээ. Мөн тэрээр "Шүдэн дээрээ биеийнхээ бүх жингээр тогтох үзүүлбэрийг үзүүлсний дараа гадаадынхан хамгийн түрүүнд надаас “Чиний шүд яг өөрийнх чинь мөн үү , хүрч үзэж болох уу” гэж гайхсан байдалтай байнга асуудаг. Тэгэхэд нь би "Энэ бол монгол шүд. Энэ үзүүлбэрийг зөвхөн Монголчууд л хийж чадна” гэж бардам хариулдаг" гэжээ.
Дашрамд дуулгахад Э.Цацралийн Италид ажиллаж байсан циркийн гэрээний хугацаа дуусч амралтаар эх орондоо өчигдөр ирээд байгаа аж. Энэ хугацаанд тэрээр “Монголжингоо” уран нугаралтын холбоотой хамтран ирэх сард болох амьд тоглолтод оролцохоор болсон байна.
Сэтгэгдэл (1)