Алба хааж байсан цэрэг офицертоо дарамтлуулж, дөрвөн зүү залгисан хэрэг олон хүнийг цочирдуулаад байгаа. Энэ байдлаас болоод эцэг, эхчүүд хүүхдүүдээ цэрэгт мордуулахаас зүрхшээж эхэлсэн нь нууц биш. Ямартаа ч зүү залгисан хүүг хотод ирсэний дараахан бид уулзаж түүний аав болон өөрөөс нь ярилцлага авч олон нийтэд хүргэж байсан. Харин энэ удаад хүүгийн хагалгааг хийсэн үү, ямар нэгэн хуулийн байгууллагынханд хандсан эсэх талаар зарим нэг асуултанд хариулт авахаар Цэргийн госпиталийг зорьсон юм.

Хүүгийн аав А. Пүрэв-Очиртой уулзаж ярилцлаа.

-Намайг өмнө нь ирэхэд хүү чинь хагалгаанд ороогүй, дөрвөн зүү аль нэг эрхтэнд нь шигдсэний дараа орно гэж байсан. Харин одоо хагалгаанд орсон уу?

-Хагалгаанд ороод тав хонож байна. Нэг л зүү авсан. Эмч нар үлдсэн гурван зүүг нь өтгөнөөр нь дамжин гарчихсан гээд  байгаа. Гэхдээ би нүдээрээ харж, үзээгүй болохоор итгэхгүй л байна. Биеийн байдал мэс хүргэсэн болохоор ядруу л байгаа. Нүдний хараа тогтворгүй, толгой, ууц нуруугаар нь хатгуулаад, юм ярихаараа ээрч гацаад сайнгүй л байна даа.

-Дотор эрхтнүүдэд нь ямар нэгэн шарх үүсээгүй гэж байна уу. Ядаж л төмрийн хор гүймээр юм?

-Эрхтнүүдэд нь ямар ч нөлөө үзүүлээгүй л гэж байгаа. Хэрвээ тийм бол ямар ч зовиургүй байх байсан шүү дээ. Бас нэг зүйл сонин зүйл байгаа. Эмч нь болохоор тэр зүүг бөөрнийх нь арын цулцгар маханд байсан гэж байсан. Харин Хилийн цэргийн хүн болохоор элгэн талдаа байсан гэсэн гээд хоёр өөр юм яриад байгаа юм. Хэн нь үнэн яриад байгааг ойлгохгүй л байна. Зүүний хувьд хялгасан зүүнээс арай том зүү байсан. Би харсан л даа. Харин авъя гэхээр өгөхгүй байгаа юм. Тэр чинь надад нотлох баримт шүү дээ.  Мэдээж төмөр биет хүүгийн маань гэдсэн дотор өчнөөн хоног байсан болохоор бусад эрхтэнд нь зүүний хор гүйх ч юм уу ямар нэг аргаар нөлөөлсөн л гэж бодож байна.

-Зүү залгиулсан гэх Баатар дэслэгч таньтай холбоо барьсан уу?

-Надтай ердөө уулзаагүй. Харин нэг утсаар  ярьсан. Тэгэхдээ намайг сүрдүүлэх өнгө аястай сонин сонин л зүйл ярьж байна билээ. Шүүх цагдаа нь шийдээд өгөх биз дээ.

-Баатар дэслэгч өөрөө зүү залгиулаагүй гэж өргөдөл гомдол бариад яваа юм билээ?

-Харин тийм. Намайг Хил хамгаалах ерөнхий газар дээр аваачаад хэвлэл мэдээллийн хэрэгслээр мэдээлэл битгий цац. Хилийн цэргийн нэр хүнд, танай хүүхдийн нэр хүндэд ч муугаар нөлөөлж байна гэсэн утгатай юм ярьсан. Гэтэл маргаашнаас нь өөрсдийгөө өмгөөлсөн мэдээлэл өгөөд эхэлсэн. Тийм болохоор би тэмцлээ зогсоохгүй. Миний хүүг өөрөө зүү залгисан гэж ард түмэн бодож байгаа шүү дээ. Гэтэл тийм юм байхгүй. Би хүүгээ худлаа ярина гэж бодохгүй байна. Гурван ч удаа зодуулж, дөрөв дэхь дээр нь энэ асуудал үүсч байгаа шүү дээ. Тэгэхээр би хүүдээ итгэж байна. Цэргийн албанаас чөлөөлөгдөх гэж өөрөө зүү  залгисан гэж хүмүүс буруугаар ойлгоод байх шиг байна билээ. Миний хүү намайг хориглоод байхад өөрөө сайн дураараа цэрэгт явсан хүн. Гэтэл яахаараа албандаа дургүй болж, өөрийнхөө аминаас уйдсан биш дээ зүү залгиад зогсож байхав дээ.

-Хилийн цэргийн газраас тэгвэл таны хэлж ярих эрхийг боогоод л байгаа гэсэн үг үү?
-Дээр намайг аваачиж нэг уулзсан. Өчигдрөөс хойш бас яриад, уулзаж, ярих асуудал байгаа гээд байгаа. Би хөдөөний юм мэдэхгүй хүн болохоор хажуудаа хууль мэддэг хүнтэй очихгүй бол болохгүй гэсэн хариу өгсөн. Хуулийн зөвлөх авсан байгаа. Тэр хүнтэйгээ очиж уулзана даа. /Яг энэ үеэр Хилийн цэргийн байцаагч түүнтэй уулзах гэж ирэв. Сэтгүүлч гэдгээ мэдэгдчихвэл аав хүү хоёрт улам л хүндрэлтэй байх гэж санаад холоос ажиглав/

-Эмчилгээний зардал мөнгийг нь цаанаас нь дааж байгаа биз дээ?
-Тэгсэн. Би ойр зуурын боолт, эм тарианы л мөнгө гаргаж байгаа. Гэхдээ энэ хот гэдэг газар чинь хөдлөөд л мөнгө юм. Энд ирээд сар болох гэж байна. Одоо дахиад хэр удахыг хэлж мэдэхгүй юм. Мөнгө санхүүгээс авахуулаад ар гэрийн ажил төрөл ч хэцүүдлээ.  Би хамаатныхаа айлд л байж байна.

-Эмнэлэгээс хэзээ гарах талаар эмч нар хэлэхгүй байна уу?
-Ёстой мэдэхгүй байна. Энэ чинь цэргийн эмнэлэг, тэгээд хүү маань цэргийн албандаа одоо хэр байгаа болохоор миний дураар гаргахгүй юм билээ. Одоо бие нь зүгээр болонгуут цэргийн анги руу нь авч явна гэсэн. Миний хувьд цэргийн анги руу нь буцаахгүй талаас нь хөөцөлдөж байгаа. Хагалгаа хийлгээд, оёдолтой байгаа хүнд   цэргийн амьдрал яаж нийцэх юм бэ. Хэрвээ гаргаад авчихвал хувийн эмнэлэг юу байна, хүүгээ эрүүл саруул болтол нь явах газар байвал бүх газраар нь явна. Эрүүл байвал арга нь олдох байлгүй дээ.

-Та холбогдох газруудад нь өргөдөл гомдол гаргав уу?
-Гаргасан. Өчигдөр Улсын ерөнхий прокурорын газар, Хил хамгаалах ерөнхий газарт энэ асуудлын хурдан шийдэж, тэгэхдээ Улаанбаатар хотод шийдэж өгөхийг хүссэн өргөдөл өгсөн.

- Хил хамгаалах газрын эх сурвалж энэ хэргийг Увс руу шилжүүлсэн гэж өчигдөр хэллээ. Энэ талаар таньд мэдэж байгаа зүйл байна уу?

-Мэдэхгүй. Надад лав юу ч дуулгаагүй. Би өргөдөлөө өгчихөөд байж байгаа хүн. Хэрвээ тэгж хэлсэн бол өнөөдөр асууж сураглана даа. Надад мэдэгдэхгүйгээр ингэж шийднэ гэж байхгүй байлгүй дээ.

-Цэрэгт ер нь боловсрол мэдлэг үндэс угсаагаар нь их ялгаварладаг гэсэн. Та ч гэсэн хүүхдээ боловсролоосоо болж л дээрэлхүүлж өдийд ийм байдалд орсон гэж бодож байгаа гэл үү?
Хөвсгөл Цагаан-Уул сумын аймгийн хоёрдугаар багийн малчин А.Пүрэв-очир би хүүхдээ боловсролгүй өсгөснөөр өдийд ийм байдалд хүрлээ л гэж бодож байна. Цэрэгт ер нь боловсрол мэдлэг, үндэс угсаагаар нь их ялгаварладаг. Мөн цэрэгт яваад ирж байгаа залуусын ихэнх нь ямар нэг өвчтэй болсон байдаг. Манай аймагт л гэхэд цэрэгт яваад ирэхдээ олон удаа хатгаа авсанаас болоод уушиг нь устсан, нуруу нугасны өвчтэй болсон хүмүүс их бий. Хэдий малчин хүний үг ч гэсэн төр засаг үүнийг анхааралдаа авах хэрэгтэй.

Харин Хил хамгаалах газраас тухайн үед ийм тайлбарыг өгч байв.

Д.Баасанжав:Офицер буруутгагдвал хатуу арга хэмжээ авна. Харин байлдагч буруутгагдвал 0311 дүгээр ангийн байлдагч П.Хэнмэдэхийг цэргийн алба хаах хугацаанд хүний нэр төрд халдсан хэргээр эрүүгийн хэрэгт татна

Хэргийн талаар Хил хамгаалах Ерөнхий газрын Хэвлэл мэдээллийн төвийн дарга, хурандаа Д.Баасанжаргалаас тодруулахад "Байлдагчийн хувьд Увс аймагт байхдаа гол шалтгаанаа тайлбарлаагүй. Нийслэлд ирэнгүүтээ өгсөн мэдээлэл нь “Манай дарга намайг загнаад чи гар утас хулгай хийсэн. Одоо зүү залги гэж байгаад залгиулсан” гэсэн мэдээллийг өгсөн. Бидний хувьд байлдагчийн яриа үнэн эсэхийг тогтоогоогүй байгаа. Гэхдээ энэ хэрэгтэй холбогдуулан дотоодын шалгалт хийсэн. Хилийн цэргийн 0311 дүгээр ангийн зүгээс тийм зүйл болоогүй гэсэн. Харин эцэг эхийн зүгээс дарга нь хүчээр залгиулсан хэрэг гэж байгаа.  Баатар офицерийг ажлаас нь түдгэлзүүлж хууль хяналтын байгууллагад шилжүүлсэн байгаа. Хамгийн гол нь тус ангийн дэслэгч  “Би хуулийн байгууллагаар шалгуулж хэргийн үнэнг тогтоолгоё” хэмээн өргөдөл гаргасан. Нөгөөтэйгүүр маргааныг хэвлэл мэдээлэл болон  Хил хамгаалах газар зохицуулдаг юм биш. Үүнийг цагдаа шалгаад прокурор хянасны үүдэнд шүүх авч хэлэлцэнэ. Офицерийн тухайд хэрэгт холбоотой гэдэг нь тогтоогдвол хатуу арга хэмжээ авч, хэргийг нь үүрүүлнэ. Үүнээс гадна офицерийг гүтгэсэн гээд байгаа байлдагч буруутгагдвал 0311 дүгээр ангийн байлдагч П.Хэнмэдэхийг цэргийн алба хаах хугацаанд хүний нэр төрд халдсан хэргээр эрүүгийн хэрэгт татна. Хэн нь үнэн эсэхийг шүүхийн байгууллага тогтооно" гэв.