Нөхөр нь эхнэрээ хөнөөж, цогцсыг нь булж нуун дарагдуулсан хэрэг энэ сард цагдаагийн байгууллагад хоёр ч бүртгэгдэв.  Нэг нь нийслэл хотод гарсан бол нөгөө нь Говьсүмбэр аймагт илчлэгдсэн билээ. Тиймээс хэргийн явц ямар шатандаа явааг Цагдаагийн Ерөнхий газрын Хэвлэл мэдээллийн төвийн ажилтан Ё.Лхагвасүрэнгээс тодрууллаа.

-Говьсүмбэр аймагт эхнэрээ хөнөөсөн хэрэг гарсан гэсэн. Энэ талаарх мэдээллийг өгөхгүй юу?

-Энэ сарын 2-нд Говьсүмбэр аймгийн цагдаагийн хэлтэст цагдаагийн газрын дотор эмэгтэй хүний цогцос байна гэсэн дуудлагаар очиж шалгасан байна. Ингэхэд Говьсүмбэр аймагт оршин суудаг байсан Б гэгч болохыг тогтоосон байгаа. Сэжигтнээр түүний нөхөр болох Г гэгчийг цагдан хорьж, эрүүгийн хэрэг үүсгээд Мөрдөн байцаах ажиллагааг явуулж байна.

-Цогцос нь яг хаанаас олдсон бэ?

-Говьсүмбэр аймгийн Сүмбэр сумаас олдсон.

-Тухайн эмэгтэй яг хэдэн хоногийн өмнө амиа алдсан юм бол?

-Цагдаа нар мэдэхээс хоёр хоногийн өмнө амь насаа алдсан нь тогтоогдсон.

-Тэгвэл таван жилийн өмнө нөхрийнхөө гарт амиа алдсан эмэгтэйн хэрэгт хэчнээн хүнийг сэжигтнээр шалгаж байгаа вэ?

-Энэ хэрэг дээр шинжээч томилоод тухайн амь насаа алдсан эмэгтэйн цогцос болоод яг хэзээ хэрэг үйлдэгдсэн талаар шалгаж байгаа.  Сэжигтэн этгээд болох нөхөрт нь эрүүгийн хэрэг үүсгэн  баривчлан саатуулаад байгаа. Мөн 2-3 хүнийг нэмж шалгаж байгаа.

Мөн өөр нэг цогцос олдсон гэсэн мэдээлэл бий. Үнэн үү?

-Траншейнээс 50 орчим насны эмэгтэйн цогцос олдсон. Гэмт этгээдийг хайн эрэн сурвалжлах ажиллагаа хийгдэж байна.