Энэ долоо хоногийн дуулиант хэргүүдийн тоймыг хүргэж байна. Нөхөр нь эхнэрээ хөнөөж, цогцсыг нь булж нуун дарагдуулсан хэрэг цагдаагийн байгууллагад хоёр ч бүртгэгдэв.  Нэг нь нийслэл хотод гарсан бол нөгөө нь Говьсүмбэр аймагт илчлэгдсэн билээ.

Эхнэрээ алаад гаражиндаа хоёр хоног нуужээ

 Тодруулбал,  энэ сарын 2-нд Говьсүмбэр аймгийн цагдаагийн хэлтэст гаражин дотор эмэгтэй хүний цогцос байна гэсэн дуудлагаар очиж шалгасан байна.  Улмаар хохирогч эмэгтэйн цогцос гарч ирсэн ба хэргийг Говьсүмбэр аймагт оршин суудаг байсан Б гэгч нь хийсэн болохыг тогтоосон байна. Түүний нөхөр болох Г гэгчид өдгөө эрүүгийн хэрэг үүсгэж, цагдан хорьж мөрдөн байцаах ажиллагааг явуулж байгаа аж. Зарим эх сурвалжийн мэдээлж буйгаар эмэгтэйн цогцсыг түүний хүү олж цагдаа нарт мэдэгдсэн байна. Ер нь хүүгийн эцэг ширүүн хурц ааш араншинтай эхнэр хүүхдээ байнга дарамталдаг хүн байсныг нутгийн иргэд нь хэлж байгаа юм.  Мөн эл эмэгтэй цагдаа нар мэдэхээс хоёр хоногийн өмнө нас барсан байсан аж.

5 жилийн дараа эхнэрээ алсанаа илчилжээ

Таван жилийн өмнө нөхрийнхөө гарт амиа алдсан эмэгтэйн блокон хашаан дундаас гарч ирсэн цогцос олныг цочирдуулаад байна. Энэ хэрэг Баянзүрх дүүргийн 12-р хороо “Холбоо толгой” 38-953 тоот хашаанд гарсан юм. Энэ хэрэг дээр шинжээч томилоод тухайн амь насаа алдсан эмэгтэйн цогцос болоод яг хэзээ хэрэг үйлдэгдсэн талаар шалгаж байгаа.  Сэжигтэн этгээд болох нөхөрт нь эрүүгийн хэрэг үүсгэн  баривчлан саатуулаад төдийгүй мөн 2-3 хүнийг нэмж шалгаж байгаа аж. Хэргийг тодруулбал, Чингэлтэй дүүрэгт 5 жилийн өмнө эхнэрээ хөнөөсөн залуу Баянзүрх дүүрэгт газар авч эхнэрийнхээ цогцсыг булсан байгаа. Улмаар авсан газраа нэгэн айлд заржээ. Ингээд таван жилийн дараа эхнэрээ булсан газартаа ирэхэд газрыг худалдаж авсан айл нэлээн хөрөнгөлөг гэр бүл байсан тул тухайн айлаас хулгай хийсэн байгаа юм. Ингээд цагдаа нар түүнийг хулгай хэрэг үйлдсэнийг нь нотлон баривчлахад тэрбээр эл хашаанд эхнэрийнхээ цогцос байгааг илчилжээ.
 
Дахиад хоёр ч учир битүүлгээр нас барсан цогцосууд олдов
Түүнчлэн энэ хэрэг гарсан өдөр траншейнээс 50 орчим насны эмэгтэйн цогцос олдсон. Эл эмэгтэйн хувьд мөн гадны нөлөөтэй нас барсан байсан тул гэмт этгээдийг хайн, эрэн сурвалжлах ажиллагаа явуулж байгаа аж.

Үүгээр зогсохгүй Баянзүрх дүүргийн XI хороо “Ургах наран” хороолол руу эргэх уулзвараас 10 метрийн зайд гавлын яс буюу дунд чөмөг, сүүжний яс олдсон байна. Олдсон гавлын ясыг хэнийх, ямар учраас энэ хүн нас барсан зэрэг шалтгааныг тайлахаар Шүүх эмнэлэгт өгөөд байгаа юм байна. Ямартаа ч хэргийг Баянзүрх дүүргийн цагдаагийн хэлтэс шалгаж байна.