Унгарын нийслэл Будапешт хотноо зохиогдож байгаа чөлөөт бөхийн насанд хүрэгчдийн дэлхийн аваргад оролцох манай эрэгтэй баг тамирчид өнөөдөр хүлгийн жолоо заллаа. Тэмцээн энэ сарын 16-22-ны өдрүүдэд Будапешт хотын “Papp Laszlo Sportarena” спортын цогцолборт болох юм.

Манай эрэгтэй баг тамирчдын бүрэлдэхүүнд ОУХМ Э.Бэхбаяр /55 кг/, Э.Ням-Очир /60 кг/, Г.Мандахнаран /66 кг/, Б.Анхбаяр /74/, О.Үйтүмэн /84 кг/, Д.Хүдэрбулга /96 кг/, Ж.Чулуунбат /120 кг/ нар багтсан байна.  Тэдний дасгалжуулагчаар МУГТ Ц.Цогтбаяр,  МУГТ О.Пүрэвбаатар, Б.Баяраа, Л.Энхбаяр нар явж байгаа бол эмчээр Спортын бэлтгэлийн төвийн Спортын анагаах ухааны албаны дарга, МУГЭ Ч.Насанбат нар явж байгаа аж.