Удахгүй МАН-ын XXVII Их хурал болох гэж байна. Их хуралдаа бэлдээд МАН-ынхан тун завгүй явна. Бэлдэх ч гэж дээ хэнийгээ дарга болгох вэ гэдэг дээр ихээхэн маргаантай байгаа гэж эх сурвалж мэдээлэв.

    Ямар ч гэсэн М.Энхболдыг МАН-ын дараагийн дарга гэдэг дээр томчууд нь бараг тохирчээ. Томчууд гэдэгт С.Баяр, Сү.Батболд, М.Энхболд, Ө.Энхтүвшин нар багтаж байгаа аж. Харин томчууд гэсэн тодотголд албан ёсоор багтдаггүй ч өөрийгөө том гэдэгт итгэсэн зарим хүмүүс МАН-ын дараагийн даргад өрсөлдөхөөр бэлдэж эхэлсэн сураг гарлаа.

    Тиймээс М.Энхболд ногоон гэрлээр шууд дарга болохгүй нь тодорхой аж. Түүнтэй УИХ-ын гишүүн Д.Лүндээжанцан өрсөлдөхөөр намынхантайгаа уулзаж эхэлжээ. Сүүлийн үед Д.Лүндээжанцан ихээхэн амбицтай байгаа. Энэхүү амбиц нь Ерөнхийлөгчийн сонгуульд МАН-аас хэн нэр дэвших вэ гэдэг дээр илэрч гарсан юм. Тэрээр нам дотроо нэр дэвшин өрсөлдсөн. Энэ удаа ч гэсэн намынхаа даргын төлөө нэрээ дэвшүүлэн өрсөлдөх аж. Гэхдээ нам дотроо дэмжлэг багатай. Өвөрхангайн Бага хурлын хэдэн гишүүд л дэмжих байх. Мөн МАН-ын ахмадууд гараа өргөх магадлалтай. Тэгээд л дэмжигчдийн хүрээ нь хумигдаж мэднэ. УИХ-ын дарга байсан, парламентад хамгийн олон удаа суусан, Ерөнхийлөгчийн сонгуульд нам дотроо өрсөлдсөн гэх мэт үзүүлэлтүүд нь түүнийг хатгаад зүгээр суулгахгүй МАН-ын даргын төлөө өрсөлдсөн гэсэн шинэ имижийг бүрдүүлж мэдэхээр болжээ.

    Харин Д.Лүндээжанцантай тун ойролцоо нэгэн эрхэм МАН-ын даргын төлөө өрсөлдөхөөр зэхэж байгаа нь Ц.Нямдорж юм. Тэрээр Д.Лүндээжанцан шиг УИХ-ын дарга байсан, парламентад хамгийн олон жил суусан хашир туршлагатай. Тиймээс одоо л үзээд алдахгүй бол ийм боломж дахин хэзээ ч ирэхгүй гэдгийг Д.Лүндээжанцан ч, Ц.Нямдорж ч ойлгож байгаа бололтой. Учир нь одоо М.Энхболд МАН-ын дарга боллоо гэхэд хамгийн багадаа дөрөв түүнээс ч илүү олон жилээр нөлөөллөө тогтоох боломжтой. Тэгээд дараагийн даргыг хүлээнэ гэвэл Д.Лүндээжанцан, Ц.Нямдорж хоёр насны хувьд хэтэрхий оройтсон байна. М.Энхболдоос гадна нэг үе намын даргад нэрлэгдээд байсан Д.Цогтбаатар, C.Бямбацогт, Ж.Энхбаяр, Д.Зоригт, Ж.Сүхбаатар гэх мэт далаад оны үеийн залуус хүссэн хүсээгүй хүч түрэн ороод ирнэ. Тэр үед Д.Лүндээжанцан хийгээд Ц.Нямдорж хоёрт ямар ч боломж гарч ирэхгүй. Тиймээс л энэ хоёр М.Энхболдтой өрсөлдөхөөр намынхантайгаа ярьж эхэлсэн байна. Ц.Нямдоржийн хувьд ямар ч үед МАН-ыг хамгаалж ирсэн. Хурц түргэн зантай. Хамгийн сүүлд л гэхэд намаа шинэчлэх гэсэн залуусыг “ямар ч зориггүй” хэмээн цоллож байсан. Нам дотроо ганцаардсан чоно мэт араншинтай. Д.Лүндээжанцангийн нэгэн адил нам дотроо өөрийн гэсэн бүлэглэлгүй. Нэгэн цагт Д.Лүндээжанцангийн нэгэн адил Н.Энхбаяртай тун ойрхон явсан удаатай.

    Гэхдээ МАН-ын даргын төлөө өрсөлдөх бодолтой яваа Д.Лүндээжанцан, Ц.Нямдорж хоёрыг буруутгах үндэслэлгүй. Учир нь Н.Энхбаяр, М.Энхболд, С.Баяр, Сү.Батболд, Ө.Энхтүвшин зэрэг өөрсдөөсөө насаар дүү хүмүүст дандаа дарагдаж ирсэн. Тэд ч завсар зай гаргасангүй. Боломж олгосонгүй. Харин одоо дахиад л М.Энхболдод боломжоо алдах байх. Тэгээд дараагийн даргыг хүлээвэл 1970 оны үеийн залуусын тоосонд булагдаад үлдэнэ. Ийм зовлон, улс төрийн туршлага, насын зөрүүнээс үүдэн Д.Лүндээжанцан, Ц.Нямдорж хоёр МАН-ын даргын төлөө өрсөлдөх боломжит цаг хугацааг одоо хэмээн тодорхойлж байгаа аж. Улс төрийн арвин их туршлагатай эдгээр эрхэмүүд М.Энхболдтой өрсөлдөхөд тун хэцүү гэдэгийг мэдрэхгүй явааг эх сурвалж ойлгохгүй байгаа хэмээн тайлбарлав.