Буун дуун өглөө 09.30 минутад гарав
    УИХ-ын ээлжит бус чуулганы нээлтийн үеэр эсэргүүцэл илэрхийлж “Гал үндэстэн” холбооныхон галт зэвсэг авч Төрийн ордны хойд цэцэрлэгт орсон байгаа. Тэд өглөөний 09.25 минутын орчимд цугласан ба буун дуу 09.30-09.40 цагийн орчимд гарсан юм. Эдгээр хүмүүс ард иргэдийн бухимдал зэвсэгт тэмцэл дээрээ тулсан гэдгийг харуулахын тулд буу үүрч, бөмбөг барьж Төрийн ордны гадна жагсаал зохион байгуулах гэж байсан аж. Энэ үеэр Төрийн ордны хамгаалагчид тэднийг барьж саатуулах гэж оролдсоноор бууны гохыг хэн нэгэн нь дарж орхижээ. Өөрөөр хэлбэл Гал үндэстнийхэн санаандгүйгээр буудсан гэж гэрчүүд ярьж байна. Тэд буунаас гадна тэсрэх бөмбөгтэй байжээ.

   Улмаар эх сурвалжийн мэдээлж буйгаар тэд хийн буунаас гадна тэрсэх бөмбөгийг ч авч явсан байна. Улмаар Төрийн ордны хамгаалагчид тэдний зэвсгийг хурааж авахыг оролдох үеэр  тэсрэх бөмбөгөө хаа нэгэн газар нууж орхисон байжээ. Харин хэсэг хугацааны дараа хүчний байгууллагынхан шуурхай ажиллаж тэсрэх бөмбөгийг аюулгүй болгох арга хэмжээ авсан гэв.
Төрийн ордонд нэг хүн бэртэв
Түүнчлэн манай сурвалжлах багийг очиход “Гал үндэстэн” холбооныхон хийгээд хамгаалалтын албаныханыг ноцолдох үеэр нэг хүн бэртсэн байдалтай байлаа. Тус хүн чухам хаанаа бэртэл гэмтэл авсан нь тодорхойгүй байгаа ба Онцгой байдлын аврах хэлтсийнхэн яаралтай эмнэлгийн тусламж үзүүлэхээр авч явсан гэдгийг эх сурвалжууд хэлж байв.
“Гал үндэстэн” холбооныхоныг байцааж байна
Улмаар Гал үндэстэн холбооны тэргүүн Ц.Мөнхбаяр болон Төмөрбаатар, нарыг Сүхбаатар дүүргийн цагдаагийн газраас баривчлан авч явлаа. Энэ талаар Сүхбаатар дүүргийн цагдаагийн хэлтсийн албаны хүнээс очиж тодруулахад “Одоогоор тухайн хэрэгт холбоотой хүмүүсээс мэдүүлэг авч байцааж байна. Хэн нэгнийг цагдан хорьсон зүйл байхгүй” гэв. Харин өөр нэгэн албаны эх сурвалжийн мэдээлж буйгаар хэрэгт холбогдуулж есөн хүнийг баривчлан шалгаж байгаа гэлээ.

Ордны хөл хорио 3 цаг үргэлжлэв
Эсэргүүцлийн үеэр ордны баруун хаалгыг хааж хөл хорио тогтоосон юм. Гаднаас нэг ч хүн оруулахгүй байсан бөгөөд зөвхөн тусгай хамгаалалтынхан болоод мөрдөн байцаагчдийг нэвтрүүлж байв. Мөн Төрийн ордны дотор байгаа хүмүүсийг цонхноос хол байх ёстой гэсэн шаардлагыг тавьж Төрийн ордноос түр хугацаагаар гарч ирсэн ажилчдыг эргэж орохгүй байхыг анхааруулж байлаа. Ингээд 9.30 минутаас эхэлж хөл хорио тогтоогоод 12.40 минутад хөл хориог цуцлав.
Уриа, лоозонгуудыг буулгаж, хураалаа
Түүнчлэн хөл хорионы үеэр Сүхбаатар дүүргийн цагдаагийн бүрэлдэхүүн ирж Төрийн ордны хашаанд өлгөсөн уриа, лоознуудыг буулгав. Улмаар Сүхбаатар дүүргийн цагдаагийн газрын хашаанд аваачиж хураалаа.


 
-“Гал үндэстэн” холбоо нь 2011 онд нум сум ашиглаж тэмцлээ явуулж байсан. Харин өнөөдөр галт зэвсэгтэй ирлээ. Энэ тал дээр та ямар байр суурьтай байна?
-Буун дуу гарсан талаар би сая л мэдэж байна.Ерөнхийдөө Монгол орны байгалийн баялаг ард түмний эрх ашигт нийцэхгүй байна. Хууль нь хэрэгжихгүй улс байгаад яах юм бэ. Ялангуай хуулиа гаргачихаад хэрэгжүүлэхийн төлөө явах хэрэгтэй шүү дээ.
-Таныхаар тэгвэл зэвсэгтэй тэмцэнэ гэдэг зөв зүйл үү?
-Энэ бол мэдээж зөв зүйл биш. Зөвхөн хуулиндаа захирагдахгүй явж байгаа хувь хүний хийсэн зүйл. Төрийн ордоны хажууд ч бай Монгол Улсын хуулинд захирагдаж, хуульнаас гадуур үйл ажиллагаа явуулах нь иргэний нийгмийн байгууллагын байр суурь биш.

-Жагсаал цуглаан хийхдээ зөвшөөрөл авсан юм уу?
-Жагсаал цуглаан хийхэд зөвшөөрөл авсан үгүйг бид мэдэхгүй байна. Энэ бол “Гал үндэстэн” холбооны зохион байгуулсан ажил.