Өчигдөр УИХ-ын ээлжит бус чуулганы нээлтийн үеэр эсэргүүцэл илэрхийлж “Гал үндэстэн” холбооныхон буу болон гранат Төрийн ордны хойд цэцэрлэгт авч орсон байгаа. Улмаар тэднийг зэвсэгтэй Төрийн ордон руу оруулахгүй гэсэн хамгаалагчидтай маргалдаж бууныхаа гохыг дарсанаар өчигдрийн үймээн эхэлсэн байгаа. Төрийн ордонд буун дуу гарснаар тусгай хамгаалалтынхан болоод цагдаа нар ирж Гал үндэстэн холбооны Ц.Мөнхбаяр тэргүүтэй гурван хүнийг баривчлан авч явсан. Ингээд Төрийн ордоны хойд талын цэцэрлэгт шалгалт, үзлэг хийснээр гар аргаар хийсэн гранет олж аюулгүй болгосон. Улмаар тэднийг мэдүүлэг өгөх явцад өөр олон газарт гранат суурилуулсан байхыг олж мэдэж онц байдал зарласан билээ.
Үдийн 14.00 цагийн орчимд Шангреллагийн эргэн тойрныг цагдаа, онцгойгийнхоны хамгаалалтанд авч  онц байдал зарласан. Мөн ганц “Шангрелла”-гаар зогсохгүй БОНХЯ-нд ч гар бөмбөг тавьсан хэмээн цуурч шалгалт үзлэгийг явуулж, хөл хорио тогтоов.
Ингэж хөл хорио тогтоосны дараахан “Шангрелла”  болон БОНХЯ-ы ажилчдыг яаралтай шилжүүлэх, машин, цүнхэнд нь нэгжлэг явуулах ажлыг эрчимжүүлэв.

Ингээд “Централ таур" цамхагт нуусан гэж мэдээлсэн тэсрэх бөмбөгийг цагдаагийнхан 15.00 цагийн орчимд хогийн савнаас илрүүлсэн.
ТЕГ-аас нөхцөл байдалтай холбоотойгоор мэдэгдэл хийв. ТЕГ-ын Мөрдөн байцаах хэлтсийн дарга А.Бат-Эрдэнэ хэлэхдээ “Өнөөдөр /өчигдөр/ Төрийн ордоны хойд талд өглөө 10.30 цагийн орчимд “Гал үндэстэн” холбооныхон хийгээд Ц.Мөнхбаяр тэргүүтэй хүмүүс байлдааны гранет галт зэвсэгтэйгээр орж ирсэн. Энэ үед олон нийтэд аюултай байдлаар хүч хэрэглэхээр заналхийлсэн. Төрийн албан хаагчийг эсэргүүцсэн, амь насанд нь халдахыг завдсан ийм үйл явдал гарлаа. Энэ асуудлыг тагнуулын байгууллага тухайн үед нь цаг алдалгүй таслан зогсоосон. Мөн холбогдох байгууллагуудтай хамтран болзошгүй аюулаас урьдчилан сэргийлэх ажиллагааг хийж явуулж байна.

-“Гал үндэстэн” холбооныхонд эрүүгийн хэрэг үүсгэсэн үү?
-Энэ асуудал дээр эрүүгийн хэрэг үүсгээд Прокурорт танилцуулсан. Шалгалтын ажиллагаа явагдаж байна. Монгол Улсын Эрүүгийн хуулийн тусгай ангийн 177, 91 гэсэн хоёр зүйл ангиар эрүүгийн хэрэг  үүсгэн шалгаж эхэлж байна.

-Одоогоор хэчнээн галт зэвсэг илрүүлээд байна вэ?
-Одоогоор “Скэйз”, “сайра” маркийн буу тус тус нэг ширхэг, 7,62 мм бууны сум 46 ширхэг, гар гранат есөн ширхэгийг эд мөрийн баримтаар хурааж аваад байна.

-Нэг хүн бэртсэн гэсэн. Үнэн үү?
-Гэмт үйлдлийг таслан зогсоох, баривчлах үед эсэргүүцэж буун дуу гаргасан. Энэ үеэр хүний амь эрсдэж, гэмтэж шархдсан асуудал гараагүй болохыг хариуцлагатайгаар мэдэгдье. “Гал үндэстэн”  холбоо нь өмнө нь хэд хэдэн удаа нийгмийн хэв журмыг зөрчиж байсан. Иргэдийн өмч хөрөнгөд халдаж байсан. Энэ асуудлууд дээр ТЕГ тухай бүрт нь хууль бус үйлдлээс урьдчилан сэргийлэх талаар сэрэмжлүүлэг хүргэж байсан удаатай юм.

-Ордны хамгаалалт үүдэндээ байдаг атал яаж гранет авч орсон юм бол оо?
-Ордны хойд талын хаалга нь онгорхой байдаг тэр хэсгээр орж ирсэн байгаа. Мөрдөн шалгах ажиллагаа явагдаж байгаа учир дэлгэрэнгүй мэдээллийг өгөх боломжгүй байна.