Монгол Улсын Засгийн газрын ихэнхи тэргүүнүүд хамгийн түрүүнд хоёр хөршдөө айлчилж ирсэн. Харин шинэчлэлийн Засгийн газрын тэргүүн Н.Алтанхуяг анхны айлчилалаа Япон улсаас эхэлсэн. Тэрээр Засгийн тэргүүнээр томилогдоод сайдуудынхаа гадаад айлчилалыг хумина хэмээн мэдэгдэж байсан юм. Түүний энэ мэдэгдэл олон тайлбаруудыг дагуулсан. Ямар ч гэсэн өөрөө томилогдоод жил болсны дараа л хилийн дээс алхав.

Харин анхны айлчлалаараа “Самурай” бондоос мөнгө босгохоор шийдэв. Энэхүү бондын ач холбогдолын талаар эдийн засагчид урьдчилан дүгнэх сонирхолгүй байна. Зарим хүмүүс уг асуудалд ихээхэн болгоомжтой хандаж эхлэв. Учир нь өмнөх бондын зарцуулалт дуусаагүй байхад дараагийн бондын асуудлыг ярьж эхэлсэн нь болгоомжлол дагуулсан биз.

Аливаа айлчлалын агуулга, шийдвэрлэсэн асуудлаас гадна хэлбэрийг хэвлэлүүд олонтоо онцолдог. Энэ удаагийн Засгийн газрын тэргүүний айлчлал агуулга шийдлээc илүү хэлбэрдэлтийг ихээхэн чухалчилав.

Бодлогогүй яриагаараа зард гараад байгаа манай Засгийн газрын тэргүүний пиар ч гэсэн ихээхэн бодлогогүй хийгдэх болов. Өчигдөрийн зарим телевизийн мэдээгээр Японы хот мужуудын дарга нар манай Ерөнхий сайдыг  урьж залаад сүйд болсон гэнэ. Тиймээс Ерөнхий сайд Н.Алтанхуяг Японд элдэв урилгад дарагдаад балмагдсаар иржээ. Тэдгээр урилгын хариуд Шинэчлэлийн Засгийн газрын тэргүүн за ч гэхгүй, үгүй ч гэхгүй байсаар ирсэн гэнэ. Бас нэгэн телевизээр Япончууд манай Засгийн газрын тэргүүний эхнэрийн өндөр сайхныг шагшин магтсан тухай мэдээлэлийг ч гаргахаа мартсангүй.

Олон жилийн өмнө Н.Энхбаярын эхнэрийг Японы эзэн хааны гэр бүлийнхнээс эхлээд жирийн иргэд шагшин магтсан тухай мэдээлэл гарч ихээхэн шуугиан дэгдээсэн. Учир нь энэхүү мэдээлэл Н.Энхбаярын нэр хүндийг унагахад ихээхэн хувь нэмэр болсныг олон түмэн мартаагүй байна. Ийм үед Н.Энхбаярын нэр хүндийг унагасан аргачлалыг хуулбарласан мэдээлэлүүдийг Н.Алтанхуягийн багийнхан гаргаж олон нийтийн бухимдлыг төрүүлсээр байна.
 
Мэдээж иймэрхүү утга агуулгатай мэдээлэл Н.Алтанхуягийн дэнжигнэж буй байр суурь, унаж буй нэр хүндийг өсгөж чадахгүй гэж учир мэдэх хүмүүс тайлбарлах болов. Гэвч түүний пиарчид даргыгаа элдэв урилгад дарагдаад балмагдсан, өндөр сайхан эхнэртэй тухай мэдээлэлүүдийг цувруулсаар байна.