Солонгосын алдарт Т-Аra, Davichi, Speed, Seeya зэрэг К-pop ододын тоглолт ирэх бямба гарагт төв цэнгэлдэх хүрээлэнд болох гэж байгаа. Энэ тоглолтонд оролцох эхний баг буюу Speed хамтлаг уржигдар ирсэн. Харин өнөөдөр Т-ara болон үлдсэн хамтлагууд Чингис хаан нисэх буудалд 22.30 цагт бууна.

Тэд "Сүнжин гранд" зочид буудалд байрлах бөгөөд энэ тоглолтын хүрээнд "Т-ара", "Спийд" хамтлагууд манай говьд клипний зураг авалт хийнэ.

Сонирхуулахад  2009 онд байгуулагдсан “Т-ара” хамтлагийнхан “Үнсгэлжин залуу” киноны “Сайн хүн” дууг амилуулснаар анх олны танил болжээ. Хамтлаг анх “Super Rookies” нэртэй байсан бөгөөд Жи Ёон, Хёомин, Жи Вон, Жи Ай, Енжон нарын таван гишүүнтэйгээр байгуулагдаж, удалгүй Жи Ай, Жи Вон нар хамтлагаа орхисон байна.

Ингээд Борам, Кюри, Суёон нарыг ам бүлдээ багтаажээ. Борам алдарт гитарчин, рок од Жи Ёон, жүжигчин Ли Мо Ёон нарын охин бол Кюри интернэтийн од байв. Тэдний хамгийн анхны цомог “Absolute first” нь чамлахааргүй амжилт авчирч “Gaon” чартын дөрөвдүгээрт жагсаж, Солонгосын шилдэг шинэ залуу охидын хамтлаг шагнал хүртсэн байна. Тэд дууны клипээ кинодрамын аргаар хийдэг байсан нь олны анхаарлыг татаж амжилтад хүргэсэн аж.