Өнгөрсөн даваа гарагт тусгай хамгаалалтын газарлуу буу шагайж, энд тэнд тэсрэх бөмбөг байрлуулсан нөхдүүд бол зүгээр нэг дээл өмсөж, буу агсаж явдаг "ажилгүйчүүд" биш гэж байгаа. Уг нь тэднийг зарим нэг хүмүүс улс орныхоо төлөө чин сэтгэлээсээ зүтгэдэг гэж үзэж байхад нөгөө хэсэг нь зүгээр л  хийж байхаа олж ядсан нөхдүүд гэлцдэг. Гэвч энэ бүх таамгийн хажуугаар тэднийг ингэж тэмцсэнээрээ амьжиргаагаа дээшлүүлэх хэд арван төгрөг олдог гэх өөр нэг гэрчүүд гарч ирэв. Тэгэхээр гэрчүүдийн мэдүүлж байгаа бүхэн үнэн бол тэд сая саяаар нь, тэрбум тэрбумаар нь олж чаддаг сүйхээтэй хүмүүс болж таарлаа.

Учир нь эдгээр төрийн бус байгууллага, хөдөлгөөнүүд нь уул ус, нутаг нугаар явж хаа газрын уул уурхай эрхлэгчдээс овоо хэдэн төгрөг салгачихдаг байсан нь тогтоогдсон. Тэднээс айж балмагдаж хамаг байдгаа тавьсан хэсэг нөхөд одоо ч хуулийн байгууллагынханд үнэн мөнийг гэрчлээд сууж байгаа гэх. Тэгвэл гэрчүүдийн хэлж байгаа үнэхээр үнэн бол тэд тэтгэврийн хэдэн төгрөг хараад сууж байдаг хөгшчүүд биш. Харин хөдөлгөөн нэгдлийнхээ нэрээр халаасаа хүндрүүлчихдэг "залуус" болж таарах нь.

Ерөөсөө л  Г.Чагнаадорж, Ц.Мөнхбаяр, Г.Болдбаатар, М.Баатархуяг бүгд л тэтгэвэртээ гараад уг ажлыг эхлүүлсэн гэж байгаа. Тэгэхээр тэтгэврийн хэдэн хөгшчүүд юм юмыг амжуулж байсан байгаа биз. Ямартаа ч хүнийг хөгширсөн гэж бодолтгүй л юм байна шүү.