Цагдаа буу барьж, баг өмсөж дэлгүүр дээрэмдэхийг завдсан. Замын цагдаа хүний аминд хүрсэн. “Гал үндэстэн” хөдөлгөөнийхөн гар бөмбөг хотын хаа сайгүй байрлуулж, буу барьж төрийн тусгай хамгаалалттай газарт орсон гэх мэтээр энэ долоо хоногт болсон сенсаацтай үйл явдлыг сийрүүлж байна.

Сенсаац 1: Гал үндэстнийхний хийсэн хэрэг нийгмийг цочроов

Ц.Мөнхбаяр тэргүүтэй хүмүүс Төрийн ордонруу буу шагайж энд тэндгүй гар бөмбөг тавьсан хэрэг даваа гарагт гарсан. Улмаар буу барьж жагссан гэх зургаан хүнийг өдгөө цагдан хорьж, эрүүгийн хэрэг үүсгээд байгаа. Мөн тухайн үед гар аргаар хийсэн гранат 9, буу 2, сум 46 ширхэгийг илрүүлээд байсан бол эдгээр этгээдүүдийн мэдүүлгийн явцад дахин гар бөмбөг, тэсрэх бодис, буу, сум ихээр гарч ирсэн. Тэд “Шангрелла”, БОНХЯ, Төрийн ордон гээд л хаа тааралдсан газраа гар гранат байрлуулж олон нийтийг цочроосон юм.

Сенсаац 2: Замын цагдаа нар хүний аминд хүрэв
Замын цагдаа хүний аминд хүрсэн ноцтой хэрэг өнгөрсөн мягмар гарагийн 20.00 цагийн үед гарсан. Тодруулбал, Дарь-Эхийн Ганц худгийн автобусны буудал дээр Замын цагдаагийн газрын хамгаалалтын тусгай тасгийн цагдаа н.Түмэн-Өлзий, н.Батдэлгэр нар согтууруулах ундаа хэрэглэсэн үедээ замын хөдөлгөөнд оролцож, хоёр хүнийг дайрсан.  14-10 улсын дугаартай автомашин жолоодож явсан дээрх хоёр албан хаагчийн дайрсан хоёр хүний нэг нь газар дээрээ нас барж, нөгөө нь ГССҮТ-д хүргэгдсэн аж. Одоогоор гэмтсэн хүний бие маш хүнд байгаа аж. Энэ талаар албаны Замын цагдаагийн олон нийттэй харилцах хэсгээс тодруулахад,   "Цагдаа, шүүх, прокурорын алба хаагч холбогдсон хэргийг улсын  Прокурорын дэргэдэх Мөрдөн байцаах алба шалгаж байгаа. Тэндээс асуу" гэв.  Дашрамд хэлэхэд, өнгөрсөн жил ч бас замын цагдаа хүн дайрч, тухайн хохирогч эмэгтэй гэмтлээ даалгүй нас барж байсан билээ.

Сесааци 3: Эхнэрээ зэрлэгээр хөнөөсөн залуу амиа хорложээ
Говьсүмбэрт эхнэрээ зэрлэгээр хөнөөсөн Ж.Ганхуяг хорих ангид амиа хорлосон гэх мэдээллийн Өдрийн сонин мэдээлсэн байна. Тодруулбал,Говьсүмбэр аймгийн харьяат Ж.Ганхуяг өнгөрсөн наймдугаар сарын 30-ны өдөр эхнэрийнхээ аминд хүрч, гаражиндаа нуусан аймшигт хэрэг гарсан.  Тэгвэл хэрэгтэн аймгийнхаа чанга дэглэмтэй 425 дугаар хорих ангид саатуулагдаж байхдаа амиа хорлосон талаар эх сурвалж мэдээллээ. Тэрээр эхнэрээ хэдэн шаардлага тависных нь  хариуд хүрз, царилаар зодож зэрлэгээр хөнөөсөн.  Эднийх хоёр хүүхэдтэй бөгөөд нөхөр байнга архи ууж гэр орныхныгоо түгшээж байсныг нутгийн иргэд хэлсэн юм.  Ж.Ганхуягийн хувьд энэ сарын 14-ний өдөр 12-14 цагийн хооронд өмдөөрөө өөрийгөө боомилж амиа хорлосон байжээ.   

Говь-Алтай аймгийн харьяат, Говьсүмбэр аймгийн иргэн Ж.Ганхуяг үйлдсэн хэргийнхээ талаар мэдүүлэг өгч амжаагүй шахам байхдаа өөрийгөө егүүтгэжээ. Ямартаа ч хүний аминд хүрсэн этгээд амиа хорлосон учир тухайн хэргийг хэрэгсэхгүй болгож магадгүй юм.

Сенсааци 4: Зүүнсалаанаас Хүннүгийн үеийн 29 булш оллоо
Сонгинохайрхан дүүргийн нутаг Зүүнсалаагийн шинэ эцэс орчмоос Хүннүгийн үеийн булш олноороо олдсон талаар Зууны мэдээ сонин мэдээлсэн байна.Тиймээс ШУТИС болон МУИС-ийн оюутнууд, археологичдын баг түүхийн үнэт олдворуудыг авран хамгаалах малтлагыг энэ сарын 6-наас хийж эхэлсэн байна. Одонтын 23 гэх гудамж тэр чигтээ түүхийн ховор олдворыг олон жилийн турш хадгалж ирсэн нь хамгийн түрүүнд мэдрэгдсэн байна. Тус газрын орчимд өдгөөгөөс 2200 жилийн тэртээ амьдарч байсан хүмүүсийн 29 булш байгааг археологичид тогтоожээ.

Тэдгээрийн ихэнх нь айлын хашаанд орчихсон байгаа гэнэ. Заримынх нь дээр жорлон барьчихсан, эсвэл айлын байшингийн доогуур тал нь орчихсон, бүр хогийн цэгийн дор ч байсан байна. Тиймээс ул мөр нь арилж болзошгүй буюу нэн түрүүнд малтлага хийж, авран хамгаалах шаардлагатай 15 булшийг энэ сард багтаан гаргахаар ажиллаж байгаа аж.  11 хоногийн хугацаанд хоёр булшны олдворыг бүрэн гаргажээ. Ийнхүү нийслэл Улаанбаатараас түүхийн үнэт олдвор олноороо олдсон батлдагдаад байгаа гэнэ. Дашрамд дуулгахад, малтлага хийж дууссан гурван булш гурвуулаа тухайн үедээ тодорхой хэмжээгээр тоногдчихсон байжээ.

Сенсааци 5: Гурван жил хүүхэд тарчлаасан этгээдэд тэнсэн харгалзах ял оноожээ
Хөвсгөл аймагт төрсөн ахынхаа хүүхдийг гурван жил амбаарт хорьж тарчлааж байсан этгээдэд тэнсэн халгалзах ял оноогоод өнгөрсөн талаар ихэнх сонин мэдээлсэн байна.

Тодруулбал, дунд сургуулийн багш, хоёр хүүхдийн ээж н.Дэлгэрмаа гэгч эмэгтэй талийгаач ахынхаа хүүг гурван жилийн турш амбаартаа хорьж, хоолны үлдэгдлээр тэжээж байсан хэрэг Хөвсгөл аймагт өнгөрсөн тавдугаар сард гарсан билээ.16 настай хүүг өвөлд нь гэрийн үүдэнд, зунд нь амбаарт гавлан хорьж, зодож, тарчлаасан гэх хэргийн буруутанд хариуцлага тооцсон байна.  Хүүг гурван жилийн турш хорьж тамласан, хоёр багш эмэгтэйд холбогдох хэргийг шүүх хурал өнгөрсөн наймдугаар сард Хөвсгөл аймгийн шүүхэд болжээ. Шүүх бүрэлдэхүүн хэргийг хянан хэлэлцээд хүүг “гардан” хорьж байсан н.Дэлгэрмаад 1.6 жилийн тэнсэн харгалзах ял оноосон байна. Харин хүүхэд асран хамгаалах эрхээ дур мэдэн шилжүүлсэн, буруутныг өөгшүүлсэн гэх н.Дэлгэрмөрөнд 800 мянган төгрөгийн мөнгөн торгууль ногдуулсан байна. Хүүгийн хувьд одоогоор Улаанбаатар хотод төрсөн ээжтэйгээ хамт амьдарч байгаа гэнэ.

Сенсааци 6: 10 настай хүүхэд дайраад зугтсан жолоочийг эрэн сурвалжилж байна
Хүүхэд дайраад зугтсан этгээдийг эрэн сурвалжилж байгаа талаар Монголын үнэн сонин мэдээлсэн байна. Баянзүрх дүүргийн 22 дугаар  хорооны 14 дүгээр сургуулийн хойно улсын ноймер дугаар нь тодорхойгүй автомашины жолооч хүүхэд дайрч хэргийн газраас зугтжээ.

Хэргийн тодруулбал, өнгөрсөн пүрэв гарагт 10 настай дөрөвдүгээр ангийн сурагч Т-г хичээлээ тарж явахад нь мөргөж унагааж зугтжээ. Бэртсэн  хүүхдийн өгч байгаа мэдүүлгээр тухайн мөргөчихөөд зугтсан машин нь цагаан өнгийн жижиг ачааны машин байжээ.

Сенсаац 7: Цагдаа буу барьж, баг зүүж дэлгүүр дээрэмдэхийг завдав
Чингэлтэй дүүргийн дөрөвдүгээр хорооны нутаг дэвсгэрт байрладаг “Толла” хүнсний дэлгүүрт баг зүүсэн этгээд халдаж, хийн буугаар сүрдүүлэн худалдагч Т гэгч эмэгтэйг айлган сүрдүүлж орлогыг нь дээрэмдэхийг завдсан.  Тэгвэл уг хэргийг Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийн эрүүгийн төлөөлөгч 33 настай Э гэгч үйлдсэн юм.   Одоогоор хэргийг Улсын ерөнхий прокурорын дэргэдэх Мөрдөн шалгах хэлтэст шалгаж байгаа юм байна.