Японы мэргэжлийн сүмогийн 68 дахь Их аварга Монголын чөлөөт бөхийн холбооны ерөнхийлөгч Асашёорюү Д.Дагвадорж ирэх жил Олон улсын бөхийн төрлүүдийн нэгдсэн холбоо /ФИЛА/-ны захирлын сонгуульд өрсөлдөнө гэдгээ зарлалаа.

2014 оны есдүгээр сарын 27-29-нд Узбекстаны Ташкент хотноо зохион байгуулах чөлөөт бөхийн дэлхийн аварга шалгаруулах тэмцээний үеэр болох уг сонгуульд Асашёорюүг дэмжинэ гэж ФИЛА-гийн дэд ерөнхийлөгч, Японы иргэн Фүкүда Томиаки мэдэгджээ.Тэрбээр “Асашёорюү өрсөлдвөл сонгогдох магадлал өндөр тул Японы тал түүнийг дэмжиж оролцоно. Мэргэжлийн сүмод шинэчлэл хийх хэрэгтэй хэмээн ил тод ярьдаг байсан түүний нэр хүнд ФИЛА-д өндөрт байдаг” гэж ярьжээ.

Энэ жилийн хоёрдугаар сард ФИЛА-гийн ерөнхийлөгч болсон Ненад Лалович 2020 оны олимпийн наадамд чөлөөт бөхийн спортыг үлдээж чадсан гавьяатай хүн. Түүний дараагийн хийх ажил нь холбооны дотоод асуудал, шинэчлэл байгаа. ФИЛА өнөөдөр 25 захиралтай ч  бүс нутаг, танил талаараа хуваагдсан олон бүлэг болж хуваагдсан цаашдын бодлого зорилтыг тодорхойлоход төвөгтэй байгаа юм. Тиймээс ирэх жилийн сонгуулиар Ерөнхийлөгч Лалович шинэ баг бүрдүүлэн ажиллахаар зэхэж байна.