Энэ сарын 16-ны өглөө “Эрдэнэтийн Гок”-ийн үйлдвэрт ноцтой осол гарч нэг хүн  харамсалтайгаар амиа алдсан талаар бид мэдээлсэн. Тодруулбал тус үйлдвэрийн цахилгаан цехэд осол гарч 26 настай эмэгтэй өндрөөс унаж амиа алдсан бол 43 настай эрэгтэй хүнд гэмтсэн. Бэртсэн иргэн Д.Энхбаатар Баян-Өндөр сумын нэгдсэн эмнэлгийн Эрчимт эмчилгээний тасагт зургаа, долдугаар хавирганы далд хугарал, гэмтлийн гаралтай уушги болон дотор эрхтний дарагдлын хам шинж гэсэн оноштой эмчлүүлж байгаа аж. Харин талийгаач Б.Батмөнхийн хувьд “Эрдэнэт” үйлдвэрийн Баяжуулах фабрикт цахилгаан тоног төхөөрөмжийн засварчнаар зургаан жил нэг сар ажилласан 26 настай эмэгтэй байжээ. Одоогоор эл хоёр хүнийг  бэхэлгээгээ буруу хийснээс ийнхүү осолдох нөхцөл үүссэн гэх дүгнэлтийг ослын шалтгаан нөхцлийг тогтоох Эрдэнэт үйлдвэрийн комисс гаргаад байгаа юм байна. Тиймээс энэхүү дүгнэлтээ Эрдэнэт хотын  МХЕГ-т хүргүүлээд байгаа аж. Харин  Мөрдөн байцаах газраас уг хэрэгт эрүүгийн хэрэг үүсгэн шалгаж эхэлжээ.