Сүүлийн үед нэгэн гажиг ч гэмээр юм уу хачин ч гэмээр юм уу албан тушаалын хуваарилалт явах боллоо. Энэ нь Соёл, спорт, аялал жуулчлалын яаманд илүүтэй харагдаад байх шиг. Уг нь, залуу хүмүүсээ дэмжиж ажиллахад болохгүй зүйлгүй ч гэлээ бас хэтэрхий хавтгайруулах нь хэр зохистой байдаг юм бол оо гэх хүмүүс ч их байгаа. Энэ бол нэг талаасаа АН урлагийнхантай илүү сайн ажилладагийг харуулж байгаа юм. Нөгөө талаар үүгээр дамжуулж ард түмэнийг татах гэсэн оролдлого гэж үзэх хүмүүс ч бий.  Ямартаа ч АН-ын үед албан тушаалд томилогдсон урлаг соёлын оддыг доор сийрүүлье.

Нийслэлийн Соёл, Урлагийн газрын даргаар Quiza ажиллаж байна
Албан тушаалд томилогдсон хамгийн эхний  хүнээр дуучин Quiza буюу Б.Батцэнгэлийн нэрлэж байна.  Тэрбээр Нийслэлийн Соёл, Урлагийн газрын томилогдоод жил орчим болох гэж байна. Батцэнгэл нь Нийслэлийн Ардчилсан Залуучуудын Холбооны дэд Ерөнхийлөгчөөр ажиллаж байсан бөгөөд Ерөнхийлөгчийн 2009 оны болон УИХ-ын 2012 оны сонгуульд АН-ын сурталчилгаанд ажиллаж байсан билээ. Б.Батцэнгэл нь МУИС-ийн социологийн анги, Чехийн Карлын Их Сургуульд тус тус суралцаж байгаад төгсөлгүй орхисон бөгөөд Монголд ирмэгцээ өнөөг хүртэл уран бүтээл хийж байсан юм байна. Мөн тэрбээр Монголын “Эмнести интернэшнл” ТББ-ын гишүүн.

Э.Бадар-Ууган, жүжигчин Б.Цолмонбаяр, Т.Бархүү нар бүгд дарга
Олны танил эрхмүүдээс Бээжингийн олимпийн аварга, дэлхийн аваргын мөнгөн медальт Э.Бадар-Ууган спорт хорооны дарга болж залуу алдартнуудыг гишүүнээр элсүүлсэн.

Тэгвэл тус холбооны залуучуудын соёл урлагийн хорооны даргаар “ТВ Коктейль” хамтлагийн жүжигчин  Б.Цолмонбаярыг сонгосон.

Харин дэд даргаар нь “Х-Түц”-ийн жүжигчин Т.Бархүү ажиллахаар болсон билээ. Энэ хороо нь соёл урлагийн бүх салбарт хүрч үйлчлэх төдийгүй залуучуудын соёл урлаг болон гоо зүйн мэдлэгийг дээшлүүлэх, урлагийг сурталчлах, энэ салбарт ажиллаж, уран бүтээл туурвиж буй залуучуудын эрх ашгийг хамгаалахад гол анхаарлаа хандуулах ажээ.

Спортын бэлтгэлийн төвийн даргаар Б.Наранбаатар томилогдсон
Мөн Соёл, спорт, аялал жуулчлалын сайд Ц.Оюунгэрэлийн тушаалаар Спортын бэлтгэлийн төвийн даргаар Монгол Улсын гавьяат тамирчин, ДАШТ-ий мөнгө, хүрэл медальт Баяраагийн Наранбаатарыг томилогдсон. Лондоны олимпод зодоглосон шавилхан биетэй Намбаа гавьяат софт теннисний Ч.Наранбаатарын халааг авч, чөлөөтийн дэвжээгээ даргын суудлаар солив. Дотооддоо болж буй тэмцээнийг зохион байгуулах, шигшээ баг, тамирчдын бэлтгэл сургуулилалтыг хариуцан ажиллах үүрэгтэй энэхүү төвийг хуучин БТСГ-т ажиллаж байсан 66 хүний бүрэлдэхүүнтэйгээр байгуулжээ.

П.Сэрдамба Монголын олимпын боксын холбооны ерөнхий нарийн бичгийн дарга болов
Спортынхноос ганц Э.Бадар-Ууган ч биш Хөдөлмөрийн баатар, гавьяат тамирчин П.Сэрдамба Монголын олимпын боксын холбооны ерөнхий нарийн бичгийн даргаар ажиллаж байгаа.
Боксын спорт сонирхогч хүүхэд, залуусын дунд нэлээдгүй үлгэр дуурайлал болж явсан гавьяат тамирчин маань олон ажил хийхээр төлөвлөсөн бөгөөд гадаадад эх орноо сурталчлах томоохон зорилт тавьсан гэдэг.

Загвар өмсөгч, жүжигчин Н.Оргил бас дарга
Эдгээр хүмүүсийн араас ССАЖЯ-ны Соёл Урлагийн бодлогын хэрэгжилтийг зохицуулах газрын дарга Н.Оргил нэрлэгдэх нь зүй биз. Соёл, спорт, аялал жуулчлалын яамны сайд Ц.Оюунгэрэл Соёл урлагийн газрын даргаараа жүжигчин, загвар өмсөгч Н.Оргилыг томилсон. Харин түүгийг энэ газрын даргаар очиход хүмүүс тийм ч ам сайтай байгаагүй. Тэр битгий хэл түүнийг кино ярихаас бус соёл урлагийн талаар авч хэрэгжүүлсэн зүйл алга хэмээх нь бий.

АЖ Ц.Төмөрбаатар Ц.Оюунгэрэл сайдын зөвлөх
Соёл, спорт аялал жуулчлалын сайд Ц.Оюунгэрэлийн зөвлөхөөр Ардын жүжигчин Ц.Төмөрбаатар сонгогдсон гэдгийг та бүхэн мэдэж байгаа биз ээ.
Монголын кино урлагийн томоохон төлөөлөгчдийн нэг Ц.Төмөрбаатар эрхэм сайдын зөвлөх болохынхоо өмнө хэвлэлд өгсөн ярилцлагадаа “Хийж чадаж байгаа юм чинь өөрийгөө ч бас үнэлэх хэрэгтэй. Монгол жүжигчдийн амьдрал тийм ч сайн биш. Бидний алтан үеийн гэж нэрлээд байгаа жүжигчид буцахдаа юутай буцсан юм бэ. Юу ч үгүй байсан шүү дээ. Гэтэл бусад орны жүжигчдийн амьдрал ахуй нь асуудалгүй байдаг. Энэ бол манай төрийн бодлого байхгүй байгаагийн нэг жишээ” хэмээн хэлсэн байгаа юм. Үүнээс үзэхэд олны танил жүжигчин маань  мэргэжил нэгтнүүдийнхээ төлөө оюун ухаанаа багагүй зарах бололтой.

Энэ мэт АН-ын ачаар урлаг соёл, спортынхон дотроос аль сүүхэйтэй гэсэн нь албан тушаалд томилогдоод авчихжээ.