Өмнөх Засгийн газрын үед дураараа дургиж, дунд чөмгөөрөө жиргэж байсан зарим хурган дарга нарын “но”-илэрч “аав”-ын хаалга татсаар байна. Тэдний улсаас идсэн мөнгө саяар биш хэдэн тэрбумаар хэмжигдэж байгаа нь харамсмаар. Тухайлбал Газрын тосны газрын даргаар ажиллаж байсан Д.Амарсайхан гэгчийн мөнгө угаасан, албан тушаалаа урвуулан ашигласан гэх хэрэгт холбогдох мөнгөний тоо 40 сая долларт хүрчээ.
   Түүнийг агентлагийн даргаар ажиллаж байх үед Хятад болон Монголын Засгийн газрын бүтээгдэхүүн хуваах гэрээгээр ажилладаг “Петрочайна Дачин Тамсаг”-ийн ашигаас асар их мөнгө дутсан нь ил болоод байгаа. Бүр тодруулбал “Петрочайна Дачин Тамсаг” болон Газрын тосны газрынхан хуурамч тайлан гаргаж, дундаас нь мөнгө иддэг байсан нь тогтоогдон шалгагдаж байна.

    2007 онд энэ хоёр газрын тайланд 51,4 сая ам.доллар буюу 465,264 баррель тосны, 2010 онд 245,624 баррель тосны зөрүү гарсан байна. Хэдий тийм ч шалгалт илрэхээс нааш хэн ч энэ тухай асуудал болгон яриагүй байдаг. Харин бүтээгдэхүүн хуваах гэрээний дагуу 2011 оны эхний найман сард Монгол улсын төсөвт орох ёстой байсан 24 хувийн орлогоос нэг хувь нь Хонконг дахь “SunWang” гэдэг компаний данс руу оржээ. Энэ нь 1,5 сая ам.доллар аж. Үүнээс зарим нь Монголын арилжааны банкинд хувь хүний данс руу шилжиж “угаагдсан” байна. Мөн дээрх “SunWang” компаний данс руу Хятадын Засгийн газарт очих ёстой байсан мөнгөний нэг хувь нь ч шилжээ. Тиймээс энэ хэрэг зөвхөн Монголын Засгийн газарт, хуулийнханд хамаатай биш, Хятадын Засгийн газраас ч шалгаж эхлээд байгаа аж. Эх сурвалжийн мэдээлснээр энэ мөнгө угаасан хэрэгтэй холбоотойгоор “Петрочайна Дачин Тамсаг” компанийн Хятадын талын дарга нарыг мөн шалгаж эхэлсэн байна.
  Ийнхүү МАН-ын бас нэгэн идэвхитэй гишүүн мөнгө угаасан хэрэгт холбогдон дуулиан тарьж байна. Түүнийг Ерөнхий сайд асан С.Баярын хүн ч гэдэг. Газрын тосны даргаар ажиллаж байх үедээ хүүхдээ гадаадад сургаад авсан сүйхээтэй эр. Харин хүүхдээ сургуульд явуулсан мөнгө нь Засгийн газарт очих байсан “хууль бус” мөнгө байсан бололтой.
  Д.Амарсайханыг Газрын тосны газрын даргаар ажиллаж байсан үед “Петрочайна Дачин Тамсаг”-аас 40,5 сая долларын газрын тос дутчихаад байгаа гэж цагдаагийнхан мэдээлж байна. Үүнээс өөрөөр  хэдэн төгрөг цувчуулсан нь ч бүрхэг. Тиймээс Хятадын Засгийн газар, Монголын тал ч энэ хэргийг хүч гарган шалгаж байна.