МУГЖ С.Жавхлангийн санаачилан хэрэгжүүлж буй “Хамаг Монгол” төслийн хаалтын тоглолт нөгөөдөр Чингисийн талбайд болох гэж байна. Соёл урлаг, дуу хуураараа нэгдсэн Монгол цустай ахан дүүс нэгдэж Хамаг монголыг төслийг хэрэгжүүлж байгаа нь энэ билээ. Эх орон, төрөлх нутагтаа, элгэн садан, олон үндэстэн ястануудаа нэгтгэхээр сэтгэлийн гал, аялгуу дуугаараа уриа дуудлага хийн Буриад, Халимаг , Өвөрмонгол, Тува ахан дүүстэйгээ хэдийн ханьсаж эхэлсэний гэрч болох энэхүү төсөлд ОХУ-ын Халимаг улсын дуучин Шараан Бадам хаалга, ОХУ-ын Тува улсын төв театрын гавьяат жүжигчин, дуучин, хөөмийч Саидаш Монгуш, ОХУ-ын Буриад улсын дуучин Чингис Раднаев, Өвөрмонголын “Хөх хээр” хамтлагийн дуучин М.Баясгалан, МУГЖ С.Жавхлан, түүний гэргий уртын дууч Г.Эрдэнэчимэг зэрэг алдартай дуучид нэгдээд байгаа юм.
Мөн “Хамаг монгол” төслийн багийнхан өнөөдөр “Хамаг Монгол” нэртэй цомгийнхоо нээлтийг хийж, хэвлэлийн хурал хийлээ. Тус цомогт Монгол үндэстний нийт 18 дуу багтжээ. Өнөөдрийн хэвлэлийн хуралд дуучин С.Жавхлан фэнүүд болоод “Хамаг Монгол” төслийн дэмжигч хүмүүс хуран цуглажээ. Цомгийн нээлтийн арга хэмжээд ирсэн хүн бүрт дуучин С.Жавхлан шинэ цомгоо бэлэг болгон гардуулж өгсөн юм.
“Хамаг Монгол” төсөл нь өнгөрсөн гуравдугаар сараас хэрэгжиж эхэлсэн бөгөөд Буриад, Тува, Халимаг, Өвөрмонгол, Монгол зэрэг газруудад тоглолтоо хийсэн байна. Ерөнхийлөгч Ц.Элбэгдорж “Хамаг Монгол” төслийг дэмжин ажиллаж өөрийнхөө ивээл дор авч ажиллажээ.
Мөн Халимаг улсын Ерөнхийлөгч Алексей Маратович Орлов төслийн багийнханыг цагаан гэртээ хүлээн авч уулзан баяр хүргэж амжилт хүсэн уг төслийг дэмжиж байгаагаа илэрхийлжээ. Нөгөөдөр тоглогдох хаалтын тоглолт Монгол, Тува, Өвөрмонгол, Халимаг гэсэн улс үндэстэнүүдийн ёс дэгийг харуулсан 5 хэсгээс бүрдэх аж. Хаалтын тоглолтод нийт 250 гаруй уран бүтээлч оролцох аж. Уг төсөл болон хаалтыг тоглолтыг ССАЖЯ дэмжин ажиллаж байгаа аж.
Цомгийн баярын үеэр МУГЖ дуучин С.Жавхлантай ярилцсанаа хүргэе.- “Хамаг Монгол” төслийн хүрээнд тоглолт хийгээд явж байхад хүмүүс нь та бүгдийг хэрхэн хүлээж авч байв?
- Би багаасаа Монголоороо омогшиж өссөн хүн. Миний ээж түүхч, аав маань зохиолч яруу найрагч хүмүүс. Гал голомт, түүх ёс заншлыг маш их ярьж хүүрнэж өгдөг хүмүүс байсан. Энэ их омогшлоороо эх орон гэдэг үзэл маань дэвэрч байлаа. Энэ ажил маань цаашид үргэлжилнэ. Ер нь би “Хамаг Монгол” төслийнхөө ажлаар маш олон ээж, аавуудтай уулзаж байсан. Тувад явж байгаад малчин айлд ороход нэгэн ээж биднийг хараад баярлан уйлж байсан. “Бид үргэлж монголчууд руугаа цайныхаа цацлыг өргөдөг шүү дээ. Бид үргэлж л Монголынхоо заяаг их байг гэж боддог шүү дээ” гэж уйлж хэлж байсан ээжүүд олон байсан. Бидэнд айраг, цагаа хоол хүнсээ бэлдээд угтаж авах хүмүүс ч байсан. Халимагийн гудамжинд явж байхад “Та бүгд их ачтай хүмүүс юм. Манай гэрт явж очье” гэж хэлэх ч хүмүүс байсан. Дэлгүүрт яваад ороход дугаарлаж байсан хүмүүс бидэнд зайгаа тавьж өгч байсан. Биднийг их санаж хүлээдэг хүмүүс байна лээ. Дэлхийн нөгөө бөөрөнд дайн болж байна. Тэгэхэд Хамаг Монгол бид нэг нэгээ гээд сэтгэлээсээ зүтгэж байна. Ингэж байгаа нь үнэхээр гайхалтай. Өвөрмонгол ээж хүн цайныхаа дээжийг өргөхдөө “Монголын минь заяа бүтэн байг” гэж хэлдэг. Гэтэл бид нар өөрсдийг нь хужаа гэдэг. 6000 км замыг туулаад бид уулзаж, нэг дор цуглаж тоглолтоо хийх гэж байгаадаа баяртай байна.
- Цаашид уг төслөө үргэлжүүлэх үү?
- “Дэлхийн Монгол” нэртэйгээр үргэлжүүлнэ. Бид удахгүй Америк явж тэнд байгаа монгол ахан дүүстээ очиж тоглоно.
- Монголын талаас Ерөнхийлөгч Ц.Элбэгдорж ихээхэн тусалцаа дэмжлэг үзүүлсэн юм байна. Харин Тува, Буриад, Өвөрмонгол, Халимагийн зүгээс яаж дэмжиж ажилласан бэ?
- Бид нарыг Халимагт яваад очиход Ерөнхийлөгч нь надтай хамт тоглолтон дээр дуулсан. Тайзны ард уйлаад энэ ажлыг сайн зохион байгуулаарай гэж надад хэлсэн. Халимагийн Ерөнхийлөгч хэлэхдээ “Бид энэ цагаас хойш хамтдаа байх ёстой. Сэтгэл зүрх, яс, цус гарал үүсэл маань нэг шүү дээ” гэж хэлсэн. Тувад болсон тоглолтыг тус улсын Соёлын яам нь зохион байгуулсан. Бас Ерөнхийлөгч нь галын тулгыг өөрийнхөө өргөөнд залж хүлээж авсан. Мөн Буриадын Соёлын яам, Засгийн газар биднийг дэмжсэн. Бид Тусгаар тогтносон, эрх чөлөөтэй оронд төрсөн хүмүүс. Харин бидний заримд ийм хувь тохиол дутсан байж магадгүй. Тиймээс энэ хүмүүсийг эх орондоо халуун сэтгэлээр сайхан хүлээж авъя. Бид дэлхий дээр маш олуулаа. Дэлхийн 16 оронд Монголоор омогшидог олон хүмүүс байна. Энэ хүмүүс чинь Монголоо санаж байдаг юм шүү. Бид бүгд бие биенээ хайрлая. Энэ арга хэмжээг маань хамгийн анх Ерөнхийлөгч Ц.Элбэгдорж маань дэмжиж ажилласан. Тиймээс бид ачийг нь хариулж нөгөөдөр тоглолтоо маш сайн тавъя гэж бодож байна.
Т.Энхэлээ
Сэтгэгдэл (5)