Өнөөдөр сүмогийн их аварга, МУГТ, Хөдөлмөрийн баатар Д.Дагвадоржийн төрсөн өдөр тохиож байна. Энэ өдөр тэрээр 33 нас хүрч байгаа юм. Монгол улсынхаа нэрийг дэлхийд сурталчилж, сүмогийн ертөнцөд эд бяраа гайхуулж явсан их аваргадаа Монголын ард түмэн халуун баяр хүргэж байна.  Д.Дагвадорж бол яах аргагүй Монголын сод хүн. Авъяас хөдөлмөр, ааш авираараа ч гэсэн бусдаас онцгойрч байдаг нэгэн. Одоогоос 10 жилийн өмнө мэргэжлийн сүмогийн 68 дахь их аварга болж элэг нэгт Монгол түмнээ баярлуулсан Д.Дагвадоржийг сүмогийн түүхэнд  хамгийн их амжилт гаргасан монгол хүн гэж хэлж болно. Их аваргын араас олон монгол хөвгүүд сүмод хөл тавьж шагшим амжилт гаргаж явна. Д.Дагвадорж 2004 оноос 2007 он хүртэл сүмо бөхийн дэвжээг ганцаараа  эзэгнэж явсан. Түүнийг үнэхээр "Энэ цагийн баатар" гэж нэрлэхээс өөр арга үгүй юм. Энэ өдөр Асашёорюү Д.Дагвадорж өөрийн баярыг интернэт дэхь найзуудтайгаа хуваалцдаг уламжлалтай. Тэрбээр твиттер хуудаснаа төрсөн өдрийн мэдээллээ хүргэж, баярласан сэтгэлээ илэрхийлжээ. Их аварга өмнөх жил ээждээ баярлаж буйгаа илэрхийлэн 32 ширхэг сарнай бэлэглэж байв. Харин энэ жил ээжийгээ хэрхэн баярлуулах нь тодорхойгүй байна. Ингээд Их аваргын тухай 24 баримтыг энд дарж үзнэ үү.