Твиттер хуудаст дагагчийн тоогоороо толгой цохиж яваа Танхай эмээ гэгч болон Ерөнхий сайд нарын хооронд бяцхан "тулаан" үргэлжилж байна. Танхай эмээ гэгч Ерөнхий сайд Н.Алтанхуягийн зургийг эвлүүлж, баахан шоглосны хариуд сайд "Шүүмжилж болно, доромжлол, гүтгэлгийг цаашид тэвчихгүй юм байна" хэмээн хариу барьсан нь шуугиан дэгдээгээд байгаа. Үнэндээ Н.Алтанхуяг сайд Танхай эмээ гэгчийг шүүхэд өгнө гэж албан ёсоор мэдэгдээгүй "жиргээчид"-ын дунд ийм яриа тарж, маргаан өрнөөд байна. Ерөнхий сайдаа ингэж гутаан доромжилж болохгүй гэсэн хэсэг байхад, энэ бол үг хэлж, үзэл бодлоо илэрхийлэх эрх чөлөө гэж маргаж байгаа юм. Мөн хурц үгтэй, шооч жиргээтэй Танхай эмээ гэгч хэн бэ? гэж бие биенээсээ асууцгааж байна. Ерөнхий сайдтайгаа он-лайн талбарт ана мана "үзэж" байгаа түүнийг хөгшин үү, залуу юу, эрэгтэй юу, эмэгтэй юу гээд сонирхогчдын тоо нэмэгдсээр.

   Уг нь ганц манайд ч биш бүх оронд сайд, дарга нарыг элэглэгчид байдаг. АНУ-ын Ерөнхийлөгч Б.Обамагийн нүүрийг будсан, нүцгэн эвлүүлсэн, угж хөхүүлсэн гээд янз бүрийн зургууд интернет сүлжээгээр явж л байдаг. Харин манай Ерөнхий сайдад иймэрхүү шоглоом "ахадсан" бололтой. АНУ-ын нэгэн сэтгүүлч "Америкт Б.Обама зэрэг өндөр албан тушаалтан, алдартай оддыг "тэнэг" гэж дуудах нь энгийн үзэгдэл бөгөөд ямар нэгэн гэм зэм хүртдэггүй. Харин энгийн иргэнийг "тэнэг" гэж доромжилбол хуулийн өмнө хариуцлага хүлээдэг. Алдартай, олны танил хүмүүс "пянгаа" дааж сурсан байх хэрэгтэй" хэмээж байсан. Тэгвэл манай сайд, дарга нарыг энэ мэт элэглэл ихээхэн эмзэглүүлдэг бололтой дог.