Ноёд группын ерөнхийлөгч Г.Буяндорж бусдаас их хэмжээний мөнгө залилсан, авлига өгсөн, улсын төсөвт их хэмжээний хохирол учруулсан зэрэг хэд хэдэн үндэслэлээр цагдан хоригдоод нэг сарын өнгөрч байна. Тэгвэл түүний гэргий МУГЖ Ариунаа өдөр тутмын нэгэн сонинд гэр бүлийнхээ тухай дэлгэрэнгүй ярилцлага өгчээ.

Тэрээр нөхөрт нь үүсээд байгаа хэргийн тухай “Захиалгаар эзнийг нь шоронд хийж байгаад л юмыг нь эзэрхийлэн авч байна шүү дээ. Өнөөдөр манай нөхөр хохирогч. Гэтэл хохирогчийг хорьж цагдаад, хохироогч нь хүслээ хангаад л явж байна. Бусдад эд хөрөнгөө алдсан хүн гэмт хэрэгтэн болчихдог ёс хаана байдаг юм бэ. Билэгт бол хуурамч хохирогч. Өнөөдөр үндэслэлгүйгээр хөрөнгөжсөн хүмүүс, худалдагдсан албан тушаалтнууд бусдын хувь заяаг хүслээрээ шийддэг, нэр төрд нь халддаг, хэлмэгдүүлдэг болжээ. Гэхдээ үнэн ялна” гэв.

Цааш нь тэрээр өөрт энэ бүхэн өөрт нь болоод гэр бүлд нь хэрхэн нөлөөлж буйг  “Би нэгхэн сарын дотор хоёр хүүгийнхээ харц доошоо унахыг харлаа. Миний үс бууралтлаа. Би нойтон дэртэй хонож байна. Энэ бол хүний амьдрал шүү. Алддаггүй, онодоггүй хүн гэж байхгүй. Бид цөөхүүлээ. Битгий нэг нэгийгээ харгисла. Битгий хэлмэгдүүл. Би энийг л хүсч байна” хэмээжээ.