Монголын кино сонирхогчид тэр дундаа кино урлагийн салбарынханд алдаж боломгүй сайхан боломж олдож энэ сарын 4-9 хооронд "Улаанбаатар" олон улсын анхдугаар кино наадам зохион байгуулагдахаар болсон билээ.

Кино урлагийн салбарын олон улсын хамтын ажиллагааг нэмэгдүүлэх, дэлхийн сор болсон киног Монголын үзэгчдэд ҮНЭ ТӨЛБӨРГҮЙ хүргэх зорилготой тус наадмын албан ёсны нээлт залуу найруулагч Ч.Хоролдоржийн анхны бүрэн хэмжээний уран сайхны кино болох “Шарга даага” бүтээлээр эхэлж өчигдөр Франц кино өдөрлөгийн хүрээнд “Зөвшөөрөгдсөн хувилбар”, “Ердийн гүйцэтгэл”, “Брагийн гэр бүл” гэсэн гурван киног үзэгчдийн хүртээл болголоо.

Харин өнөөдөр гарах кино хуваарь хийгээд товч танилцуулгыг хүргэж байна.

“Ило ило” 18.00-19.40 1-р танхим

Үйл явдал Сингапурт өрнөнө. Гурвуулаа амьдардаг нэгэн гэр бүлд Филиппин гаралтай залуу бүсгүй үйлчлэгчээр ирнэ. Тереза бусад филиппин эмэгтэйчүүдийн адилаар амьдралынхаа төлөө хүний газар ирсэн нэгэн. Шинэ хүнтэй зохицон амьдрахад тэдэнд тийм ч амаргүй. Зүггүй хүү Жиале бүсгүйтэй үг хэлээ олж найзалснаар, Тереза энэ гэр бүлийн нэгэн чимээгүй хэсэг болно. Үйл явдал 1997 онд буюу Азийн санхүүгийн хямралын үеэр болно.

2013 оны Каннын олон улсын кино наадмын “Алтан камер” шагналт тус кино маш энгийн түүхээр дэлхий нийтийг хамарсан үйл явдлыг харуулж чадсанаараа онцлог болсон талаар кино наадмыг зохион байгуулагчдын зүгээс дуулгасан юм.

Тус кино үзэгчдэд хүрсний дараа киноны найруулагч нь 29 настай Энтони Чэньтэй уулзалт хийх юм.

“Сальво” 20.25-22.10 1-р танхим

Сицилийн мафид ажилладаг хөлсний алуурчин Сальво нь хүйтэн сэтгэлтэй, харгис хэрцгий, дайчин. Нэгэн удаа эсрэг талын мафийн этгээдийг устгахаар гэрт нь нууцаар орохдоо өөрийнхөө ахыг алуулж буйг мэдсэн хүчин мөхөс хараагүй охин Ритаг анзаардаг. Сальво түүнийг авч явснаас хамаг хэрэг мандана.

2013 оны Каннын олон улсын кино наадмын “Шүүмжлэгчдийн долоо хоног”-ийн Гранпри шагналыг хүртсэн Италийн найруулагч Антонио Пиацца, Фабио Грассадониа нарын бүтээлийг дуу дүрсний өндөр чанартайгаар “Улаанбаатар” олон улсын кино наадмын хүрээнд үзэх боломжтой.

Дашрамд дуулгахад “Улаанбаатар” олон улсын кино наадмын хүрээнд гарч буй кинонууд ҮНЭ ТӨЛБӨРГҮЙ-гээр “Тэнгис” кинотеатрын дэлгэцнээ гарах бөгөөд киноны дараа тухайн уран бүтээлийг туурьвисан уран бүтээлчидтэй уулзах боломжийг олгож буйгаараа онцлог юм.