Сүүлийн үед цагдаагийн байгууллагын ажилтнуудаас гэмт хэрэг үйлдэх явдал өсөх хандлагатай болж байгаа юм.  Өөрөөр хэлбэл, хуулийн байгууллагынхнаас гэмт хэрэгт өртөмтгий нь цагдаа нар гэхэд хэлсдэхгүй болоод байна. Цагдаа нарын үйлдлээс болж  цагдаагийн байгууллагын нэр хүнд олны дунд унаад байгаа.  Өмнө нь цагдаагийн байгууллагын ажилтнууд хээл хахууль авсан, иргэдтэй зүй бусаар харьцсан гэх хэрэгт их холбогддог байсан бол өдгөө бүр буу барьж, баг өмсөж дэлгүүр дээрэмдэхийг завдах болжээ.

Албаныхны хэлж буйгаар энэ нь цагдаагийн газар хэлтсийн удирдлагууд өмнө нь гарч байсан хэрэг зөрчлийн байдалд дүгнэлт хийж, прокурорын мөрдөн байцаагчаас өгсөн мэдэгдлийн мөрөөр хэрэг зөрчлөөс урьдчилан сэргийлэх талаар тодорхой ажил зохиохгүй байгаатай холбоотой гэж  байгаа юм.

Зарим нэгэн тоо баримтыг дурдахад, УЕП-ын дэргэдэх Мөрдөн байцаах  албанд өнгөрсөн 10 жилийн хугацаанд мөрдөн байцаагчид холбогдох 1108, хэрэг бүртгэгчид холбогдох 641, цагдаагийн ажилтанд холбогдох 3672 гомдол, мэдээлэл иржээ. Үүнээс шүүх 378 хэрэг бүртгэгч, 261 мөрдөн байцаагч, цагдаагийн 2426 ажилтанд холбогдох хэргийг шийдвэрлэсэн байна. Тэд хүний амь, эрүүл мэнд, өмчлөх эрх, нийгмийн аюулгүй байдал, шүүн таслах ажиллагааны эсрэг, тээврийн хэрэгслийн хөдөлгөөний аюулгүй байдал, албан тушаалын гэх мэт гэмт хэрэгт холбогдсон аж.

Нийгэмд хэв журам сахиулж, иргэддээ туслах, тэднийг хамгаалах үүрэгтэй цагдаагийн албан хаагчдын өнгө төрх өнөөдөр нэг иймэрхүү л байна.

Цагдаа нарын хэрэгт холбогдсон байдлын талаар ЦЕГ-ын хэвлэл мэдээллийн ажилтан, цагдаагийн ахмад Ё.Лхагвасүрэнгээс тодрууллаа.

-Цагдаа нар хэрэгт холбогдсон явдал өнгөрсөн сард цөөнгүй гарлаа. Цагдаагийн алба хаагчдад хэрхэн хяналт тавьдаг вэ?
-Өнгөрсөн сард гурван албан хаагчийн хэргийг хуулийн хүрээнд Прокурорын дэргэдэх мөрдөн байцаах хэлтэст шалгаж байна. Цагдаагийн ажилтнууд зөрчил, дутагдал гаргасан тохиолдлыг ЦЕГ-ын дотоод аюулгүй байдлын хяналтын хэлтэс хянадаг. Иргэдээс 126 тусгай дугаарт өгсөн мэдээллээр болон бусад хэлбэрээр ирүүлсэн гомдол, саналын дагуу шалгаж зөрчлийг тогтоодог.

-Албан хаагч зөрчил гаргасан тохиолдол ямар шийтгэл оноох вэ?
-Хэрэв тухайн албан хаагч зөрчил гаргасан бол цалингийн хувиар шийтгэх, хүндэрсэн тохиолдолд ажлаас нь халах хүртэл арга хэмжээ авч байна.  Саяхан шүүхээр таслагдсан 40 саяын хэргийг манайд Дотоод аюулгүй байдал хяналтын хэлтэс илрүүлсэн. Мөн цагдаагийн дээрмийн хэргийг ч цагдаагийнхан илрүүлсэн.

-Ийм төрлийн хэрэг өмнө нь гарч байсан уу?
-2011 онд 2131 цагдаа зөрчил гаргаж, шийтгэгдэж байсан. Албан үүрэгтээ хайнга хандсан, иргэдийг хохироосон хэргээр шийтгэгдсэн. Энэ оны эхний найман сарын байдлаар 1383 болж буурсан.  Эрүүгийн гэмт хэрэгт шалгагдсан албан хаагчийн тоо 2011 онд 101 хэрэгт 121 хүн холбогдсон бол энэ оны эхний найман сарын байдлаар 84 байна.

-Цагдаагийн ажилтнууд хэрэгт холбогдож байгаа нь юутай холбоотой бол?
-Цагдааг мэргэшүүлэх чиглэлээр багагүй ажил зохион байгуулж байна. Байнга шахуу уулзалт зохион байгуулж, зөвлөгөө сургалтыг явуулдаг.  Цаашид ч чиглэл чиглэлээр нь сургалт, зөвлөгөөг хийхээр төлөвлөж байгаа.

-Ер нь цалин хангамж муугаас хулгай, дээрмийн хэрэгт холбогдох тохиолдол байж болох уу?
-Нийгмийн хангамжийн тухайд  ажилтнууд цалингаа нэмүүлэх саналыг өнгөрсөн жилүүдэд тавьдаг байсан.  Тиймээс цалингийн шатлалыг хоёр зэрэглэлээр нэмсэн. Мөн тэдэнд орон сууцаар хангах ажлыг зохион байгуулж байна. Орон нутагт ажилладаг цагдаагийн алба хаагчдад таван жил тутамд 30 сартай тэнцэх хэмжээний тэтгэмж олгохоор болсон.