Дуучин А.Түмэн-Өлзий анхны бие даасан “Баясгалантай сайхан” уран бүтээлийн тайлан тоглолтоо энэ сарын 11-нд “Монгол бөхийн өргөө”-нд 19.00 цагаас хийхээр товоо зарлаад байгаа билээ. Тэгвэл тэрбээр тоглолтынхоо талаар дөнгөж сая хэвлэлийн хурал хийлээ. Энэ үеэр түүнээс хэдэн зүйлийг тодрууллаа.

-Таныг хөгжимчин мэргэжилтэй гэж сонссон юм байна?
-Би 1998-2005 онд Хөгжим Бүжгийн Коллежийг ёочин хөгжимчин мэргэжлээр, 2006-2009 онд Монгол Улсын Соёл Урлагийн Их Сургуулийг МУГБ Ц.Дэлгэр багшийн удирдлага дор уртын дуучин мэргэжлээр тус тус төгссөн.

-Өдгөө та хэчнээн цомог гаргаад байгаа вэ?
- 2010 онд “Ирээдүй минь” цомгийг МУСТА Э.Төрмандахтай хамтран гаргаж байсан бол 2011 онд “Хайр ирнэ”, 2012 онд “Сэтгэлийн толь” зэрэг цомгуудаа бие даан гаргасан. Түүнчлэн 2010 онд “Даяарын амгалан”, 2012 онд “Сэтгэлийн толь” зэрэг бие даасан кино концертуудаа туурвисан.   Харин энэ онд МУСТА П.Жимсээтэй хамтран “Хайлан” кино концертоо сонсогчиддоо хүргэсэн.

-“Баясгалантай сайхан” тоглолтонд чинь хэчнээн уран бүтээлч оролцох вэ?
-Тоглолтын маан ерөнхий продюссерээр МУГЖ Ч.Бат-Эрдэнэ, ерөнхий найруулагчаар “Хөсөгтөн” хамтлагийн ахлагч МУСТА Б Ариунболд, Хөгжмийн найруулагчаар "Анир" студийн захирал хөгжмийн найруулагч, МУСТА Б.Алтанхуяг нар ажиллаж байгаа бол урилгаар МУГЖ У.Далантай, МУГЖ Ч.Бат-Эрдэнэ, МУСТА Т.Дэлгэрмөрөн, язгуур урлагийн “Хөсөгтөн” хамтлаг, бүжгийн “Улаан сарнай” хамтлаг, амьд хөгжмийн "Маршал" хамтлаг, Уртын дуучид зэрэг эрхэм уран бүтээлчид оролцох юм. Түүнчлэн тоглолтын ерөнхий ивээн тэтгэгчээр “Sunshine Village” хотхон, Ивээн тэтгэгчээр “Bes Holding”, “Himon construction”, “Бодэн” групп, “Бодэнх” ххк, “Очир гэр” ххк, “Моттоо”, “B sound” нар ажиллаж байгаа.

-Таны тоглолт зохиолын дуучдын тоглолтоос хэр онцлогтой вэ?
-Амьд хөгжмийн хамтлагтай дуулна.  Мөн ирсэн зочиддоо олон сюрприз барихаар төлөвлөж байгаа.

-Тоглолтын бэлтгэл ажил дууссан уу?
-Сарын өмнөөс тоглолтын бэлтгэлээ хийсэн. Одоогоор 100 хувь дууссан гэж хэлж болно.

-Дуучин Жимсээтэй  тоглол хийж байсныг чинь санаж байна. Тэр үед та хоёр их сайхан найзууд юм шиг байсан?
-Бид хоёр оюутан байхаасаа найзалж эхлэсэн. Уран бүтээл болон амьдрал дээр бие биендээ урам, зөвлөгөө өгч, дэмжиж явдаг сайхан найзууд. Бид хоёрын хамтын уран бүтээл ганц нэгээр дуусахгүй. Цаашид  ч хамтран уран бүтээл хийнэ.

-Уртын дуучин бүсгүй рок, поп дуу сонсох уу?
-Сонсолгүй яах вэ. Багаасаа “Камертон”, “Номин талст” хамтлаг, дуучин Б.Сарантуяа, Т.Ариунаа нарын дууг сонсож өссөн. Би хүүхэд байхдаа поп чиглэлээр дуулдаг байлаа. Хойшдоо ч дуулах бодол бий. Урлагийн гавьяат зүтгэлтэн Д.Ухнаа гуайн нэрэмжит тоглолт болдог байхад би хоёр удаа оролцож мөнгөн  медаль хүртсэн. Миний хувьд хүч хүрэх зүйлдээ өөрийгөө зоригтой сориод үзье гэж боддог шүү.