“Хадгаламж” банкны дампуурал, уулын баяжуулах “Эрдэнэт” үйлдвэрийг барьцаалж их хэмжээний зээл авсан хэрэгт татагдаад буй “Жаст” группийн захирал Ш.Батхүүд холбогдох хэргийн мөрдөн байцаалт үргэлжилж байгаа юм. Энэ хэрэгт холбогдуулж төрийн болон хувь нийлүүлсэн байгууллагын хэд хэдэн хүнээс УМБГ-ын ажилтнууд тайлбар авсан тухай албаны эх сурвалж хэллээ.

Учир нь Ш.Батхүү залилангийн болон бичиг баримт, тамга тэмдэг хуурамчаар үйлдсэн нь тогтоогдсон аж. Ямартаа ч  Ш.Батхүү өөрөө хуурамч тамга үйлдвэрлэхгүй нь ойлгомжтой. Түүнд мэргэжлийн, гарын ур дүйтэй хэн нэгэн этгээд хийж өгөх нь тодорхой. Тиймээс цагдаагийн байгууллагаас ТӨХ, Төмөр зам, “Эрдэнэт”  үйлдвэрийн тамгыг хуурамчаар үйлдвэрлэсэн компани, хувь хүнийг хайж байна.  Мөн үүнтэй холбоотой тамга тэмдэг үйлдвэрлэдэг компаниудыг ч шалгаж эхэлсэн сурагтай. Хэрэв Монголд энэхүү хуурамч тамга тэмдгийг үйлдвэрлэсэн нь тогтоогдвол Эрүүгийн хуулийн 233.1, 233.2 дугаар зүйл анги болох хуурамч баримт бичиг, тамга тэмдэг, хэвлэмэл маягт үйлдэх ашиглах гэдгээр ял шийтгэл хүлээх юм.

Энэ зүйл ангид аж ахуй нэгж, байгууллагаас эрх олгосон, үүргээс чөлөөлсөн баримт, бичиг, түүнчлэн тамга, тэмдэг хэвлэмэл маягт, иргэний үнэмлэх, гадаад паспорт, хувийн бусад баримт бичгийг ашиглах буюу бусдад ашиглуулах зорилгоор хуурамчаар үйлдсэн, ашигласан, борлуулсан бол хөдөлмөрийн цалингийн доод хэмжээг 5-50 дахин нэмэгдүүлсэнтэй тэнцэх хэмжээний төгрөгөөр торгох эсхүл 1-3 сар хүртэлх хугацаагаар баривчлах ял шийтгэдэг байна.

Харин 233.2-т зааснаар тухайн үйлдлээс нь болж ямарваа нэг газарт, эсхүл нийгэмд үлэмж хэмжээний хохирол учруулсан бол эсвэл давтан үйлдсэн бол хөдөлмөрийн доод хэмжээг 51-200 дахин нэмэгдүүлсэнтэй тэнцэх хэмжээний төгрөгөөр торгох 3-6 сар баривчлах ялаар шийтгэх юм.

Хэргийг сийрүүлбэл, Английн “Стандарт” банкны Өмнөд Африк дахь салбараас “Жаст” группийн захирал Ш.Батхүү  уулын баяжуулах “Эрдэнэт” үйлдвэрийг барьцаалж 109 сая ам.доллар зээлсэнээр хэрэг эхэлсэн. Ингэж зээл авахдаа Ш.Батхүү “Эрдэнэт” үйлдвэрийн дарга захирал асан Ч.Ганзоригийн тусламжтайгаар 2009 онд зээл авсан аж. Уг зээлийг зургаан жилийн хугацаатай, гурван үе шаттайгаар авсан гэдэг. Гэвч тэрбээр өнгөрсөн гуравдугаар сараас хойш зээлээ хувиарын дагуу төлөөгүй учраас “Стандарт” банкнаас  тус үйлдвэрт хандсан албан бичиг ирүүлсэн байж. Үүний дараагаар тус банкнаас найман хүнтэй ажлын хэсэг томилогдон “Эрдэнэт” үйлдвэрт хоёр удаа ирж ажиллаад явжээ.
Гэвч “Эрдэнэт” үйлдвэрийн удирдлагууд тус үйлдвэрийг банкинд зээлийн барьцаанд тавьсан гэх нэг ч баримт олоогүй байна. Гэтэл “Стандарт” банкнаас Төрийн өмчийн хорооны дарга Д.Сугар болон “Эрдэнэт” үйлдвэрийн захирал асан Ч.Ганзориг нарын баталгаат гарын үсэг бүхий зээлийн баталгааг үзүүлсэн гэнэ.

 “Стандарт” банкныхны зүгээс өөрсдийгөө хуурамч банкинд үндэслэн зээл олгоно гэж байхгүй. Бүх зүйл хууль ёсны дагуу явагдсан гэх тайлбарыг хэлж байгаа.  Тиймээс тэд Арбитрын шүүхэд ч хандаад байгаа юм.

Харин УМБГ-ын Эдийн засгийн гэмт хэрэг мөрдөх хэлтсийн ажилтнууд Ш.Батхүүгийн “Стандарт” банкнаас авсан зээлийн гэрээний бичиг баримтад шинжээч томилон шалгуулсан гэнэ. Үүний зэрэгцээ төрийн болон хувь нийлүүлсэн байгууллагын холбогдох хүмүүсийн тайлбарыг ч цагдаагийнхан аваад байгаа аж.

Ш.Батхүү "Улаанбаатар төмөр зам"-аар давхар батлан даагчийн гэрээ байгуулж, тухайн үеийн удирдлагуудаар нь гарын үсэг зуруулсан гэх боловч мөрдөн байцаалт явцад мөн л хуурамч бичиг баримт үйлдсэн нь тогтоогджээ. Энэ нь шинжээчийн дүгнэлтээр ч батлагдаад байгаа юм.

Дашрамд хэлэхэд, Ш.Батхүүг УМБГ-ын Эдийн засгийн гэмт хэрэг мөрдөх хэлтсийн ажилтнуудын санал, НПГ-ын хүсэлтээр Сүхбаатар дүүргийн шүүхээс энэ оны наймдугаар сарын 13-нд цагдан хорьсн талаар албаны эх сурвалж хэллээ.