Арьс шир, ноос зэрэг малын гаралтай түүхий эдийг боловсруулж зах зээлд нийлүүлдэг “Дөрвөн булаг-Увс” компани саяхнаас тэмээний ноосон хөнжил үйлдвэрлэж эхэлсэн байна.

Тэмээний ноосыг эсгийнийхээ үйлдвэрт самнаж, улмаар ноос нэвчдэггүй, чанар сайтай үнэтэй даавуугаар гадарладаг байна. Нэг хөнжилд ойролцоогоор 3 кг ноос ордог аж. “Дөрвөн булаг-Увс” компанийн үйлдвэрлэсэн тэмээний ноосон хөнжил эрэлт хэрэгцээтэй, борлуулалт сайтай байна.

“Саяхан болсон баруун бүсийн үзэсгэлэн худалдаагаар 30-аад хөнжил хийхэд Тувачууд их сонирхож, худалдан авсан. Манайх бас нэг шинэ нэрийн бүтээгдэхүүнтэй болсондоо баяртай байгаа” хэмээн тус компанийн гүйцэтгэх захирал Н.Бадам онцоллоо.

Тус компани нь малын арьс, шир боловсруулж булигаар, савхи, хөх шир зэргийг үйлдвэрлэхээс гадна эсгий хийдэг байна. Энэ үйлдвэрлэлээ түшиглээд төрөл бүрийн цагаан ултай гутал оёдог бөгөөд гутал хийхэд хэрэгцээтэй бүх бүтээгдэхүүнийг өөрсдөө үйлдвэрлэдгээрээ тавуу талтай аж. Тус компани нь байнгын 30, түр ажлын байраар 20 хүнийг хангадаг, аймгийн болон баруун бүсийн “Шилдэг боловсруулах үйлдвэр”-ээр удаа дараа шалгарч байжээ. Одоогоор эсгий, хөнжил, гудас зэргийг хийж байгаа ба цаашдаа дотуур хөшиг, цаваг зэрэг монгол гэрийн бүх зүйлийг хийх гэнэ.