20 дугаар зууны манлай уртын дуучин Н.Норовбанзадын нэрэмжит “Норовбанзад сан”-гийн арван жилийн ой энэ онд тохиож буй. Тэд энэ ойг тохиолдуулан нөгөөдөр буюу энэ сарын 10-ны өдөр гурван том арга хэмжээг зохион байгуулахаар төлөвлөжээ. Тодруулбал нөгөөдөр 12.00 цагт Н.Норовбанзад, Н.Банзрагч нарын гэр-музейн нээлтийг хийх гэж байна. Нээлтэд ССАЖ-ын сайд Ц.Оюунгэрэл, тус сангийн тэргүүн Б.Дэлгэрмаа нар оролцох аж.
Үргэлжлүүлэн 13.00 цагаас СУИС-д Норовбанзадын нэрэмжит уртын дууны тэнхимийн нээлтийг хийнэ. Мөн “Хобби” сургуулийн захирал, соёл урлагийн дээд хүндэтгэл “Норовбанзад” шагналын эзэн Д.Оюунцэцэг “Уртын дуу,түүний хатан хаан Норовбанзад” сэдвээр СУИС-ийн оюутнуудад 10 минутын лекц унших юм байна.
Тус өдрийн хамгийн сонирхолтой хэсэг бол Улсын их дэлгүүрийн хоёр давхарт 14:00 цагаас болох “Уртын дууны баяр” юм. Тус баярт хүрэлцэн ирснээр Ардын жүжигчин Ш.Чимэдцэеэ, СТА уртын дуучин Б. Батмэнд, Үндэсний дуу бүжгийн чуулгын гоцлол дуучин Г.Энхбаатар, Соёмбо чуулгын уртын дуучин Э. Болормаа нарын уран бүтээлийг сонсож уртын дууны гайхамшгийг мэдрэх боломжыг олгож байгаа аж.
