Сүүлийн үед барилгын ослоос болж олон хүн алтан амиа алдах боллоо. Хөдөлмөр аюулгүй байдлаа бүрэн хангаж ажлаагүйгээс болж иймэрхүү хэргүүд өдөр алгасахгүй гарах болсоныг цагдаагийн байгууллагаас сэрэмжлүүлж байна. Өчигдөр л гэхэд БЗД-ийн 12-р хороонд ”Батширээт” ХХК-ний баригдаж байгаа барилга дээр Хэнтий аймгийн Батширээт сумын харьяат иргэн 25 настай эрэгтэй А, мөн сумын харьяат иргэн 23 настай эрэгтэй О нар угсардаг төмөр шат зөөж байгаад өндөр хүчдэлийн шугаманд хүрч тогонд цохиулж нас барсан байна. Хэргийг одоогоор БЗД-ийн цагдаагийн нэгдүгээр хэлтэс шалгаж байгаа юм. Манай сурвалжлах баг тухайн осол болсон газар очиж нөхцөл байдалтай таницаж, тус компанийн удирдлагуудтай уулзахаар Баянзүрх дүүргийн 12-р хороог зорилоо. Биднийг очиход хэрэг гарсан газарт ямар ч үйл ажиллагаа яваагүй мөн удирдлагуудаас нь нэг ч хүн байхгүй байв. Хашаанд нь манаач бололтой хоёр айл байрласан байсан бөгөөд тэнд байсан хүмүүсээс нэг ч хүн энэ хэргийн талаар мэдээлэл өгсөнгүй. 
Ажилчид нь болох хөдөөний бололтой хэдхэн залуус байсан ба тэд “ энэ ажилд ороод удаагүй” гэснээс өөр тайлбар хэлсэнгүй.Харин тус компанийн захирлын хувьд ажлаар БНХАУ-ын Эрээн хотод яваа аж. Хэрэгтэй холбоотойгоор мэдүүлэг авахаар түүнийг яаралтай цагдаагийн газарт очихыг мэдэгджээ.
Биднийг ийн тэнд байх хугацаанд тус хорооны Засаг дарга Н.Мөнхтуяа, нийгмийн ажилтантайгаа ирсэн юм. Тиймээс хорооны Засаг даргаас зарим зүйлийг тодруулав.
-Энэ барилга танай хороон дээр бүртгэлтэй байдаг уу?
-Уг нь бүртгэлтэй байх ёстой ч тэд албан ёсоор ирж бүртгүүлж, хамтарч ажиллах мэдүүлэг хүргэсэн ч хариу албан тоот ирүүлээгүй.
-Тус компанийн газар зөвшөөрөлтэй газар юм болов уу?
- Энэ барилгын газар нь зөвшөөрөлтэй бичиг баримт нь хэвийн хэдий ч газрын гэрчилгээ нь асуудалтай. Учир нь энэ газрын гэрчилгээ хувь хүний нэр дээр байдаг. Гэтэл хувь хүний газар худалдаж авсан бол заавал аж ахуй нэгж болгож гэрчилгээгээ авах ёстой. Тиймээс учраас бид МХЕГ-т хандсан. Харин МХЕГ-аас эл компанид гэрчилгээгээ өөрийн нэр дээр болгох сануулга өгсөн. Харин тэд энэ үүргээ биелүүлсэн үгийг мэдэхгүй байна.
-Нэг л хүний нэр дээр гэрчилгээ нь байдаг юм уу?
-Тус компани дөрвөн айлын газрыг худалдан авч, үйл ажиллагаа явуулж байгаа.
-Өчигдөр шөний хэргийн тухайд та хэзээ мэдсэн бэ?
-Орой 19.00 цагийн үед иргэнээс ийм мэдээлэл ирсэн. Тухайн үед хоёр хохирогчийн элсээр булсан байсан гэж мэдэгдсэн. Ингээд мэдээллийн дагуу бид өнөөдөр ирж байна. Эднийх уг нь холбоо барих утсаа өгч, бидэнтэй хамтарч ажиллах ёстой ч биднийг үл тоодог газар.
-Нас барсан залуусын хувьд тогонд цохиулж нас барсан гэсэн. Энэ компани хичнээн вольтын тог ашиглах зөвшөөрөлтэй юм бол?
-Уг нь 380 вольтын тог ашиглах зөвшөөрөлтэй. Гэвч надад иргэний өгсөн мэдээллээр 6000 вольтын тогийг хулгайгаар хэрэглэж байсан гэж хэлсэн.
-Нас барсан залуусын хувьд эмнэлгийн тусламж авах боломжгүй байсан юм байх даа?
-Хүмүүсийн ярьж байгаагаар хоёуланг нь элсээр булсан байсан гэсэн. Угаасаа тогонд цохиулсан хүний тогийг гадагшлуулах гэж элсээр булдаг гэсэн.
"Барилгаа мануулах гээд цахилгаанчин дуудсан байв"Уг газрын эргэн тойрныг хянахаар нэг хүн ирсэн байв. Энэ хүнээс хэрэг явдлын талаар асуухад "Би цахилгаанчин хүн. Би дөнгөж сая л ийм хэрэг болсоныг сонслоо. Тэгээд миний танил намайг энэ газрыг харж байгаа ч гэхээр нь ирлээ" гэв. Ямартаа ч цахилгаанаас болж хоёр хүн нас барсан энэ газар чухам яагаад цахилгаанчин хүн дуудах болов гэдэг бас л сонин юм.
Ер нь ямар нэг хууль бус үйл ажиллагаа явуулж байгаа компаниуд тухайн нутаг дэвсгэрийнхээ хороо, засаг даргатай холбоо тогтоодоггүй байх хандлагатай нь энэ хэргээс харагдаж байна. Мөн томоохон аж ахуй нэгжүүд хорооны засаг даргуудыг үл тоомсорлодог гэдгийг тус хорооны засаг дарга хэлж байв.
Ер нь ямар нэг хууль бус үйл ажиллагаа явуулж байгаа компаниуд тухайн нутаг дэвсгэрийнхээ хороо, засаг даргатай холбоо тогтоодоггүй байх хандлагатай нь энэ хэргээс харагдаж байна. Мөн томоохон аж ахуй нэгжүүд хорооны засаг даргуудыг үл тоомсорлодог гэдгийг тус хорооны засаг дарга хэлж байв.
Бид энэ талаар эргэн мэдээлэх болно
Д.Ундрах /24tsag.mn/
Сэтгэгдэл (16)