Н.Номтойбаярын хүн хутгалсан хэрэгт холбогдуулж цөөнгүй хүн шалгаж байна гэх мэдээлэл гарах болсон. Тэр дундаа “Мунзуй” хочит Г.Нямдоржид эрүүгийн хэрэг үүсгэсэн гэх болсон. Энэ талаар ЦЕГ-ын хэвлэл мэдээллийн ажилтан, цагдаагийн ахмад Ё.Лхагвасүрэнгээс тодрууллаа.

-УИХ-ын гишүүн Н.Номтойбаярт холбогдох хэрэгт хэчнээн хүн шалгаж байгаа вэ?
-Одоогоор яг тэд гэж хэлэх боломжгүй. Ямар ч байсан энэ хэрэгт холбоотой гэсэн бүх хүмүүсийг шалгаж байгаа.

-“Мунзуй” хочит Г.Нямдоржийг шалгаж байгаа нь үнэн үү?
-Үнэн. Н.Номтойбаярын гомдлоор шалгаж байгаа.

-Тэгвэл эрүүгийн хэрэг үүсгэсэн үү?
-Г.Нямдоржид эрүүгийн хэрэг үүсгээгүй.

-Гомдол гаргасан иргэн Б-гийн биеийн байдал хэр байгаа вэ?
-Хүнд гэмтэл биш байсан учир эдгэсэн.

-Н.Номтойбаяр ирж мэдүүлгээ өгч байгаа юу?
--Цаг тухайд ирж мэдүүлгээ өгч байгаа. Цагдаагийн байгууллага тайлбар мэдээллээ авч байгаа. Дашрамд хэлэхэд хэвлэл мэдээллийн ажилтнууд маань шалгагдаж байгаа хэргийн талаар, тухайн хүний талаар мэдээлэхдээ яллагдагч, хэрэгтэн мэтээр мэдээлэхгүй байхыг хүсье. Учир нь хэрэг шалгагдаж дуусаад ялын тогтоол гарсан цагаас л тэр хүн ялтан гэж хэлэгдэнэ. Түүнээс биш сэжигтэн гэж л явна шүү дээ.