Өнөөдөр 17.00 цагаас ДБЭТ-ын тайзнаа Оросын алдарт хөгжмийн зохиолч П.И.Чайковскийн алдарт “Хунт нуур” балетыг тоглох гэж байна. Гурван бүлэг, дөрвөн үзэгдэлт уг балет анх 1877 оны гуравдугаар сарын 4-нд Москвагийн Их театрт тавигдаж байжээ. Харин Монголын тайзнаа анх 1975 оны зургадугаар сарын 28-нд тоглосон аж.
Энэ удаа тус бүжгэн жүжгийн удирдаачаар УГЗ Н.Туулайхүү, ерөнхий зураачаар АЖ Б.Төмөрхуяг, Хореографи-балетмейстерээр АЖ Б.Жамьяндагва, туслах найруулагчаар МУГЖ Х.Гэрэлчимэг нар ажиллажээ.
Харин гол дүрүүдэд, цагаан хун Одетта болон Ротбартын охин хар хунгийн Одиллияд СТА Ч.Ганчимэг, хан хүү Зигфридэд СТА О.Ганцоож, Хорон санаат шидэт хар шувуу Ротбартад СТА А.Өлзий-Орших, эзэн авхайд СТА Ш.Оюунтуяа, Алиа салбадайд Т.Хан-Очир, Ордны хүмүүжүүлэгч Вольфгангийн дүрд АЖ О.Ганбаатар нар тус тус тоглоно. Түүнчлэн УДБЭТ-ын балетын жүжигчид, ХБК-ийн сонгодог бүжгийн ангийн оюутнууд оролцон тоглох аж.
