Энэ сарын 7-ны өдрийн 21.30 цагийн орчим Сүхбаатар дүүргийн 6 дугаар хорооны нутаг дэвсгэр, БНХАУ-ын Элчин сайдын яамны урд зам дээр ТӨХ-ын дарга Д.Цогтбаатарын “Соната-7” загварын суудлын автомашин машин шатсан. Одоогийн байдлаар гал гарсан шалтгааныг шалгаж байгаа юм.

Д.Цогтбаатарыг хуучин машин нь шатсан даруйд удалгүй төсвийн мөнгөөр үнэтэй машин авч унасан гэж зарим хэвлэлээр бичиж байгаа. Түүнийг “Azera” маркийн хамгийн орчин үеийн классик загварын машиныг 50 орчим мянган ам.доллароор авч  унасан гэж байгаа юм.

 Мөн сүүлийн өдрүүдэд Төрийн өмчит компаниудын захирлуудыг шинээр томилж, халж сольж байгаа учир үүнтэй холбоотойгоор машиныг нь шатаасан байж болзошгүй гэж хардах хүмүүс байгаа.

Энэ бүгдтэй холбоотойгоор түүнээс зарим зүйлийг тодрууллаа.

-    Машин шатсан хэрэгт хэн нэгнийг сэжиглэж байгаа зүйл байна уу? Галын дүгнэлт гарсан уу?

-    Галын дүгнэлт гараагүй байна. Техник бол техник. Шатсан машиныг шинэ гэж хэвлэлээр бичсэн байна лээ. Тэр бол худлаа. Хуучин дарга нарын хэрэглэж байсан “Sonota 7” гэж машин байсан. Зүгээр явж байгаад гэнэт гал гарсан. Юунаас болж гал гарсаныг шинжээчдийн баг тодруулах байх.

-    Хэвлэлээр таныг 50 мянган долларын шинэ авсан гэж бичсэн байсан. Энэ үнэн үү?

-    50 мянган долларын үнэтэй Солонгосын элчингийн авах гэж байсан машиныг бараг дээрэмдээд авчихсан юм шиг бичсэн байна лээ. Тэгэхээр энэ мэдээллийг бид зөв гаргамаар байна. Надад үзүүлэх баримтууд байгаа. Одоо миний унаж буй машиныг 2012 онд төлөвлөгөөгөөр оруулаад 2013 оны хөрөнгө оруулалтын төлөвлөгөөнд оруулсан байсан. Тэгээд тендер зарлагдаад Хьюндай компани шалгарч 48 сая буюу одоогийн долларт шилжүүлэх юм бол 28 мянган доллароор авсан гэсэн үг юм. Тендер зарлагдаад гэрээ нь байгуулагдаад машинаа нийлүүлсэн байсан. Энэ машин бол хуулийн дагуу хөрөнгө оруулалт нь шийдэгдсэн байгаа.