“Чингис хаан” олон улсын нисэх буудлаас Төв аймгийн чиглэлд ниссэн “Ми-8” нисдэг тэрэг өнгөрсөн баасан гаригт Багануур дүүрэгт осолдсон.Онгоц “А-жет” компанийнх байсан бөгөөд салхинд цохиулсны улмаас ийнхүү осолдсон юм. Онгоц осолдох үеэр онгоцонд долоон иргэн сууж явсан ч азаар нэг нь ч бэртээгүй. Харин ч загасчлахаар цаашаа алхаж явсан хэмээн Зам тээврийн сайд А.Гансүх мэдээлсэн юм. Тэгвэл онгоц хөлсөлж, онгоц нь осолдсон ч загасчлахаар явсан эрхмүүд хэн байв гэдэгт олон нийт анхаарлаа хандуулж эхэлсэн. Тэгвэл уг эрхмүүд тодорчээ. Тодруулбал, “АПУ” компанийн дэд захирал Л.Батжав, “Голомт” банкны дэд захирал Г.Ганхуяг, “Үүдтрэйд” компанийн Н.Бат-Орших, “Oversee” компанийн захирал Н.Алтан-Очир, “DF” ХХК-ийн захирал Б.Баяр, “Харш констракшн”-ийн компанийн захиралН.Батолд нар явж байжээ. Тэдний нэг нь хүүхдээ дагуулан явсан байна. Хэдийгээр тэд өнгөрсөн баасан гаригт осолдсон ч загасчлахаар цааш явсан.

-Ямартаа ч  хэргийн талаар  ЦЕГ-ын хэвлэл мэдээллийн ажилтан, цагдаагийн ахмад Ё.Лхагвасүрэнгээс тодрууллаа.

-Одоогоор хэчнээн хүнийг холбогдуулан шалгаж байгаа вэ?
-Энэ хэрэгт хамааралтай, зорчиж явсан гээд бүх хүмүүсээс гэрчийн мэдүүлэг авч байна.

-“А-жет” компанийн захиралд эрүүгийн хэрэг үүсгэсэн гэсэн. Үнэн үү?
-Тус онгоцны нисэх бүрэлдэхүүний нэг хүнд эрүүгийн хуулийн 217.1 гэсэн зүйл ангиар эрүүгийн хэрэг үүсгэсэн. Мөн Иргэний нисэх ерөнхий газрын хоёр албан хаагчид Эрүүгийн хуулийн 245 дугаар зүйл ангиар эрүүгийн хэрэг үүсгэсэн байгаа.

-Эдээр зүйл ангид юу гэж заасан байдаг вэ?
-217 дугаар зүйл анги болох Төмөр зам, усан болон агаарын тээврийн байгууллагын ажилтан тухайн төрлийн тээврийн хэрэгслийн хөдөлгөөний аюулгүй байдлын болон ашиглалтын журам зөрчсөний улмаас хүний бие махбодид хүндэвтэр буюу хүнд гэмтэл, эсхүл их хэмжээний хохирол учирсан бол тодорхой албан тушаал эрхлэх, үйл ажиллагаа явуулах эрхийг хоёр жил хүртэл хугацаагаар хасах буюу хасахгүйгээр гурван жил хүртэл хугацаагаар хорих ял шийтгэнэ.

Эрүүгийн хуулийн 245 дугаар зүйл ангид Хэрэг бүртгэлт, мөрдөн байцаалт, шүүн таслах ажиллагаанд   санаатайгаар саад учруулсан бол хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, нэг зуугаас хоёр зуун цаг хүртэл хугацаагаар албадан ажил хийлгэх, эсхүл нэгээс гурван сар хүртэл хугацаагаар баривчлах ял шийтгэнэ.