"Нарантуул" худалдааны төвийн хүнсний зах шатсанаас хойш багагүй хугацаа өнгөрлөө. Гэвч одоогоор галын дүгнэлт болоод хохирлын хэмжээ гараагүй байна. Уг нь өнгөрсөн долоо хоногт гарчих байх гэж албаныхан хэлж байсан ч одоог болтол гараагүй байгаа юм.

Гал гарсан шалтгааныг хүмүүс янз бүрээр л ярьж байгаа ч "Дүнжин гарав" худалдааны төвтэй холбож мөн гадны нөлөөтэй гэх хүн олон байгаа юм. Тэгвэл "Нарантуул" захын удирдлагууд ч галыг гадны нөлөөтэй, санаатайгаар тавьсан гэж үзэж байгаа аж. Өмнө нь тус захад гурван ч удаа гал гарч байсныг тэд цахилгаан хэрэгсэл, газтай холбож ойлгодог байсан ч энэ удаагийнхыг 100 хувь гадны нөлөөтэй гэж үзэж байгаа юм байна. Учир нь тус захад байрлах аравдугаар цайны газрын орчмоос ака бууны гурван ширхэг сумны хонгио олдсон аж. Хүнсний захын цэнхэр дээврийн зад буудаад дээшээ гарчихсан байсныг нь Ш.Сайхансамбуу захирал өөрийн биеэр очиж харсан байна. Энэ тухайгаа ч олон нийтэд мэдэгдэв.   Мөн дээвэрт нь 20 гаруй см-ийн хэмжээтэй нүхнүүд гарсан байсан гэнэ. Иймэрхүү асуудлууд байгаа учир галын дүгнэлт удаж байгааг үгүйсгэхгүй юм.

Түүнчлэн УИХ-ын гишүүн асан Ш.Сайхансамбуу галын дүгнэлтийг хүүхэд нохойн доог шиг хөгийн дүгнэлт гарвал Үндэсний аюулгүй байдлын зөвлөлд хандана гэдгээ ч хэллээ.