Цагдаагийн Ерөнхий газрын Тусгай ажиллагааны хэлтсийн ажилтан О-г  энэ сарын 9-ний өдөр албан үүргээ ажлын байран дээрээ гүйцэтгэж байхад нь бүлэглэн зодсон гэх хэрэг гараад байгаа. Тэгвэл энэ талаар Хууль зүйн сайд Х.Тэмүүжин хэлэхдээ "Манай тусгай бүлэгтээ холбоотой ийм мэдээлэл гарсан.

Тухайн үед би энэ хэрэгт шалгалт явуулсан. Болсон үйл явдал бол хэвлэлээр явж байгаа шиг биш. Тодруулбал, Цагдаагийн тусгай бүлэгт олон жил ажилласан нэг хүн байсан. 2005 онд нэг шалтгаанаар халагдсан байж байгаад энэ оны хавар буцаж ажилдаа орсон юм билээ. Ямар шугамаар ажилд орсныг нь тодруулахад танил талаараа орсон байсан. Тэр хүн би энэ цагдаагийн байгууллагад удаан байсан.

Би бол "ах" гэдэг байдлаар асуудалд хандаад өөрийнхөө шууд удирдлагын даргын үгийг эсэргүүцсэн байгаа. Өөрөөр хэлбэл жижүүрийн пост дээр байх ёстой байтал алга болсон байна гэх шаардлагыг дарга нь тавихад надад шаардлага тавьлаа хэмээн даргынхаа нүд рүү цохисон байгаа. Яг тэгж цохиж байхад нь дэд дарга нь хараад цэрэг даргаа цохилоо гээд өнөөх хүнийг шууд цохиод авсан байгаа. Улмаар тэдний дунд маргаан үүссэн байдаг. Улмаар тусгайгийн хүмүүс зураг хөргөө олон нийтэд харуулах ёсгүй байдаг. Гэтэл цохиулсан дарга нь энэ дүрмээ бариад зургаа харуулж чадахгүй байтал анх зодооныг эхлүүлсэн ажилтан зураг хөргөө олон нийтэд цацсан байдаг. Эд нарын хувьд шүүх шинжилгээгээр гэмлийн зэргээ тогтоолгочихсон явж байгаа.

Ямартаа ч бид дотоод хяналтаараа асуудлыг шалгаж байна. Мөн миний зүгээс энэ алдаа гаргасан хүмүүсээ зайлуул гэж хэлсэн байгаа. Хэвлэлээр зураг хөргөө цацсан нөхөр бол энэ албанаас зайлуулагдах нь тодорхой. Үнэхээр зодуулж нүдүүлсэн гомдолтой бол хууль шүүхээрээ яваад шалгуулах байх. Гэхдээ захирагдах ёстой албан тушаалтныхаа эсрэг гар хөдөлгөсөн гэдгээр өөрөө эрүүгийн хэрэг үүсгэгдээд шалгагдаад явна" гэв. Тэгэхээр хэвлэл мэдээллээр өөрийгөө хохирсон гэж зарлаад байгаа офицерт удирдлагынхаа биед гэмтэл учруулсан гэдэг үндэслэлээр эрүүгийн хэрэг үүсгэжээ.