Дуучин Т.Ариунаагийн нөхөр "Ноёд” группийн захирал Г.Буяндоржийг бусадтай нийлж их хэмжээний мөнгө угаасан, залилан хийсэн хэмээн цагдан хориод байгаа. Энэ хооронд түүний гэр бүл, ялангуяа эхнэр Т.Ариунаа нь хүнд байдалд ороод байгаа билээ. Ард түмний хайртай дуучинг “Миний алдар нэр хий хоосон зүйл байсан юм байна” гэж хэлэх хүртэл гундаасан энэ хэрэг хэрхэн шийдэгдэх бол гэдэг олны анхааралд байна.

   Олон жил бизнесийн салбарт явсан Г.Буяндоржийг үнэхээр залилан хийсэн үү гэдгийг шүүхээр албан ёсоор тогтоогоогүй байгаа ч түүнийг буруутай гэж итгэх хүн олон болжээ. Ямар сайндаа дуучин бүсгүй нөхрийнхөө тухайд “Захиалгаар эзнийг нь шоронд хийж байгаад л юмыг нь эзэрхийлэн авч байна шүү дээ. Өнөөдөр манай нөхөр хохирогч. Гэтэл хохирогчийг хорьж цагдаад, хохироогч нь хүслээ хангаад л явж байна. Ахин хэлье, миний хань хохирогч. Бусдад эд хөрөнгөө алдсан хүн гэмт хэрэгтэн болчихдог ёс хаана байдаг юм бэ. Билэгт бол хуурамч хохирогч. Өнөөдөр үндэслэлгүйгээр хөрөнгөжсөн хүмүүс, худалдагдсан албан тушаалтнууд бусдын хувь заяаг хүслээрээ шийддэг, нэр төрд нь халддаг, хэлмэгдүүлдэг болжээ” гэж байв. Түүний энэ үгэнд итгээгүй хүн олон.

       Тэгвэл хуул зүйн сайд Х.Тэмүүжин өчигдөр сэтгүүлчдэд мэдээлэл өгөхдөө дуучин Т.Ариунаагийн хэлснээр Г.Буяндорж залилагч биш, харин өөрөө бусдад залилуулсан байж болзошгүй тухай ам нээлээ. Тэрбээр "Хэд хэдэн хэргээр саатуулан шалгаж байна. Хэргийг шалгах явцад Г.Буяндорж өөрөө ч бусдад залилуулсан байж болох нөхцөл байдал үүссэн. Харин хуулийн байгууллагаас дуудсан цагт ирэхгүй, оргон зайлсан гэдэг үндэслэлээр цагдан хорьсон" гэв. Тэгвэл Г.Буяндоржийг залилсан гэж хэвлэлээр зарлаж явсан Г.Билэгт энэ хэрэгт холбоотой байж магадгүй болжээ.
    Тэрбээр Г.Буяндоржийг баривчилсны дараа хэвлэлд ярилцлага өгөхдөө “Миний хувьд 2011 онд Г.Буяндоржоос "Ноёд" констракшн" гэдэг Сэлэнгэ аймагт бүртгэлтэй компанийг худалдаж авсан. Барилгын карказ төдий  байхад нь худалдаж аваад 13 давхар орон сууц болгосон. Гэтэл нэг өдөр Г.Буяндорж "Энэ миний компани" гээд  хууль бус шийдвэрийг шүүхээс гаргуулаад ирсэн” хэмээж байсан юм. Мөн түүнээс олон саян төгрөг хулхидсан хэмээн ярьсан байдаг. Тэгвэл энэ эмэгтэйн яриаг цагдаагийнхан шалгаж эхлээд, өөрөө ч "хэрэгтэн" байж магадгүй гэж үзэж байгаа бололтой. Ямартаа ч хуулийнхан Г.Буяндорж болон дуучин Т.Ариунаагийн амьдралыг шийдсэн асуудлыг үнэн мөнөөр нь тогтоохоор ажиллаж байна.