Хоёр сарын өмнө шатсан “Нарантуул”-аас болж тус захын эзэн Ш.Сайхансамбуу нийт найман тэрбум төгрөгийн хохирол амсаад байгаа билээ. Цаашлаад шатсан захыг буулгаж, хог новшийг нь цэвэрлэж байгаа бөгөөд үүнд зарцуулж байгаа мөнгөний тоо талийж өгч байгаа аж.  Дээрээс нь захын орлого багасч, улсад өгдөг татвар нь ч татарч байгаа гэнэ.  

Энэ мэтээр “Нарантуул" шатсанаас болж их хэмжээний хохирол амсаад байгаа талаараа тэрбээр уртаас урт санаа алдан ярьж явна.

Одоогоор галын дүгнэлт эцэслэгдэн гараагүй ч түрээслэгчдийн зүгээс нэн даруй ажлын байртай болгож өгөхийг хүсч байгаа юм.

 Энэ талаар Ш.Сайхансамбуу "Би захыг буцаагаад барьж өгч чадна. Нэг байшин, шатаж, хэдэн хүн хохироо л биз. Би дахиад барьж л таарна. Гэхдээ хоёрын хооронд сендвичен юм хийхгүй. Ер нь бол ирэх жилээс шинэчилнэ гээд зураг гаргаж байсан. Би 20 гаруй жил бизнес хийсэн хүн. Хэдэн төгрөг байгаа. Түүнийгээ гаргаж зарна" гэсэн хариулт өгсөн байна. Тэгэхээр Ш.Сайхансамбуу удахгүй Нарантуул худалдааны төвийг илүү гоё болгож барих нь тодорхой бололтой.

 Бас нэг анхаарал татаж байгаа асуудал бол тус захын түрээслэгч нарын даатгалын хугацаа энэ оны тавдугаар сард дуусч, сунгуулж амжаагүй байсан аж. Зарим хашир түрээслэгч хувиараа даатгуулаад амжсан ч ихэнх нь даатгалгүй байсан байна.

Уг нь “Нарантуул” захын удирдлагууд түрээслэгчдээ жил бүр даатгуулдаг байжээ. Гэтэл өнгөрсөн тавдугаар сард даатгалын хугацаа нь дуусчихсан байсныг хэдэн хариуцлаггүй нөхдүүд мэдээгүй учраас сунгуулаагүй юм байна. Тэгэхээр “Нарантуул” шатсан нь цэвэр компанийн хохирол болоод хувирчихаж байгаа аж.  Ингэхээр энэ зах олон жил даатгалд мөнгө төлсөний хэргээ гаргаж чадсангүй. Түрээслэгчдийн даатгалийг сунгуулаагүйг 100 хувь ажилчдынхаа хариуцлагагүй үйлдэл гэж үзэж буйгаа ч Ш.Сайхансамбуу хэлжээ.

Тодруулбал түүний эхнэр Г.Оюунсогоо бүр хариуцлагагүй нөхөр болж байгаа юм. Учир нь Ш.Сайхансамбуугийн хувьд 2008 оноос хойш Нарантуул захын дотоод асуудалд оролцолгүй, эхнэртээ даатгаж, улстөрд анхаарч яваа билээ. Эхнэр Г.Оюунсогоо нь тус захыг удирдаж байгаагийн хувьд ажилчдын хөдөлмөр хамгаалал, эрүүл ахуйн журмыг биелүүлэх болон эрсдлийн даатгалын хугацаа зэрэгт голлон анхаарах ёстой. Гэтэл тэрбээр ажилдаа хайнга хандаж, түрээслэгчдээ үл тоосноос болж нөхрийгөө найман тэрбумын өрөнд унагаад байгаа нь энэ аж.

Хэрвээ даатгалын хугацаагаа сунгуулсан байсан бол хохирлын 80 хувийг даатгалын компаниас төлүүлэх боломжтой байж. Даатгалын компаниудын журамд зааснаар бол даатгалын тохиолдлын улмаас даатгалын зүйл бүрэн сүйрсэн бол үнэлгээний 100 хувиар,  даатгалтай хөрөнгө даатгуулагчийн өөрийнх нь буруугаар сүйрсэн бол гарсан хохирлын 80 хувиар нөхөн төлдөг байна. Даан ч “Нарантуул” захынхан хариуцлагагүй ажилласан учраас нэг ч төгрөгийн нөхөн төлбөр авч чадахгүй үлдэж байна.

 Шатсан зах дотор гоо сайхны барааны 10 гаруй павилон байсан байна. Хамгийн үнэтэй бараатай, их хохирол амссан хүмүүс нь тэд аж.

Мөн Ш.Сайхансамбуу гал гарсан талаар албан ёсны байр сууриа илэрхийлээгүй өдийг хүрсэн ч саяхан галын шалтгаан нөхцлийн талаар ам нээсэн. Тэрбээр "Нарантуул" ОУХТ-д гарсан галыг санамсаргүй зүйл биш, зориуд гал тавьсан хорлон сүйтгэх үйл ажиллагаа гэж үзэж буйгаа илэрхийлсэн байна. Галын дүгнэлт эцэслэн гараагүй байгаа хэдий ч цахилгаанаас болоогүй, дулаалгын материалаас болоогүй гэсэн мэдээлэл Нарантуул захын удирдлагуудад дуулдаж эхэлсэн гэнэ. Нөгөөтэйгүүр Нарантуулын хүнсний захын тааз нь 24 метр өндөр учраас доор гарсан гал таазанд хүртлээ наад зах нь 2-3 цаг болох учиртай гэж Нарантуулын удирдлагууд үзэж байгаа юм байна.

Тухайн үед ойрхон байсан хүмүүсийн яриагаар бол өглөөний 05 цагийн үед хоёр том дэлбэрэлт гарч, дараагаар нь гал авалцаж эхэлжээ. Иймээс зориудын хорлон сүйтгэх ажиллагаа гэж хардаж байгаагаа Ш.Сайхансамбуу нуусангүй. Учир нь тус зах дотор байрладаг цайны газруудад газ хэрэглэхийг хориглодог байна.