Монгол Улсад бүртгэлтэй “Авар” хэмээх компани Токио хотын Чиёода дүүрэгт 12 давхар барилга худалдаж авах болсон тухай мэдээлэл өдгөө Монгол, Япон хоёр улсыг дамнан шуугиулж байна.  Тодруулбал, “Пхеньяныг дэмжигч солонгос иргэдийн Япон дахь ерөнхий холбоо буюу “Чонгрён” гэдэг байгууллага байрлаж байсан уг барилгыг дуудлага худалдаагаар борлуулахад Монголд төвтэй дээрх компани таван тэрбум иен буюу 51 сая ам.доллар, монгол мөнгөн тэмдэгтээр 89 тэрбумын санал болгож ялжээ. Хамгийн гол нь Солонгос иргэдийн Япон дахь ерөнхий холбоо дампуурч, 62,7 тэрбум иений өртэй хоцорсон. Тиймээс 2012 оны долдугаар сард уг барилгыг дуудлага худалдаагаар зарж, өрийг нь барагдуулах шийдвэрийг Японы шүүх гаргажээ.

Ямартаа ч худалдаж авсан гэх "Авар"  компанийг санхүүжилтээ хэрхэн бүрдүүлсэн хийгээд чухам ямар учраас ийм их хөрөнгөөр илт давуугаар ялалт байгуулав гэх зэрэг асуудал хүмүүсийн сонирхолыг татаад байна.

Мөн зарим хүмүүс энэ компани БНАСАУ-тай холбоотой байж болзошгүй гэж үзэж байна. Учир нь Монголын иргэн, аж ахуй нэгж Японы нийслэлд барилга худалдан авч байсан тохиолдол өмнө нь гарч байгаагүй юм.

Энэ бүхнээс болоод Японы тал манай улсад хүмүүсээ илгээсэн байна. Тэд 5.1 тэрбум иенийг хаанаас босгосон, энэ компани нь ямар үйл ажиллагаа явуулдаг хийгээд “Авар” компанийн захирлын талаар мэдээлэл цуглуулахаар иржээ. Одоогоор Японы долоон сурвалжлагч манай улсад ирчихээд байгаа ба өнөөдөр буцна гэдгийг эх сурвалж хэллээ.

Тэд юу мэдээд буцсаныг хэлж мэдэхгүй ч удахгүй олон улсын хэвлэл мэдээллийн хэрэгслээр цацагдаж эхлэх нь дамжиггүй юм. Ямар ч байсан эдгээр сурвалжлагчид энэхүү компанийг их аварга Д.Дагвардорж, УИХ-ын гишүүн Д.Сумъяабазар нартай холбоотой гэж үзэж хардаж байгаа нь хэр үнэний ортой вэ гэдэг дээр хариулт аваад буцсан биз ээ.

Япон, Хойд Солонгосын харилцаа хүн хулгайлсан асуудлаас болоод таагүй байгаа энэ үед япончуудын дунд гарсан энэхүү таагуу уур амьсгал Монгол-Японы харилцаанд нөлөөлж болзошгүй гэж болгоомжлох ч хүмүүс байна.

“Авар” компанийн талаар цөөхөн хэдэн мэдээлэл олдсон нь “татвар төлж байгаагүй, Д.Сумъяабазарын эхнэрийн  ах Ч.Эрдэнэбатын нэр дээр байдаг, 40 мянгатын байранд байрладаг, мөн байгуулагдаад 9 сар л болж байгаа, Д.Сумъяабазар энэ компанид зөвлөгөө өгдөг, 100 хувь монголын хөрөнгө оруулалттай” гэсэн мэдээлэл л  байна.

Ямартаа ч өчигдөр  Ч.Эрдэнэбат  мэдээлэл хийсэн. "Тэрбээр Цэвэр бизнесийн зарчмаар  газрыг авсан,  ямар ч улс төрийн оролцоо байхгүй. Гэвч Японы болон Монголын хэвлэл мэдээллийн хэрэгслээр  дуудлага худалдаатай холбоотой  янз бүрийн мэдээлэл цацагдсанаас бол шүүх хурал түр хойшлоод байна. Дуудлага худалдаанд Японы хуулийн компаниар дамжуулж  оролцсон. Бид 5.1 тэрбум иенийг гадаадын хөрөнгө оруулалтын сангаар дамжуулан  шийдвэрлэнэ гэж төлөвлөж байгаа. Мөн миний дүү Ч.Мичидмаагийн нөхөр Д.Сумъяабазар гишүүн болохоор хүмүүс янз бүрээр хардаад байх шиг байна. Гэвч огт тийм зүйл байхгүй" гэсэн юм.

"Авар"компанийн цаана юу нуугдаж байгааг хуулийн байгууллагынхан шалгаад олон нийтэд мэдээлэх нь зүйтэй болов уу?. Үүнээс болж нийгэмд олон янзын хардлага төрөөд байна.