Нийслэлийн хэмжээнд 2013 оны 10 дугаар сард аюулт үзэгдэл, техникийн холбогдолтой ослын нийт 288 дуудлага бүртгэгдсэнээс хүний үйл ажиллагаатай холбоотой ослын 40 дуудлага,  объектын гал түймрийн 247 ой хээрийн түймрийн 1  дуудлага  тус тус ирсэн  байна.  Ирсэн дуудлагуудын дагуу Нийслэлийн Онцгой байдлын газрын аврагч, гал сөнөөгчид шуурхай арга хэмжээ авч болзошгүй гамшгийн аюулаас  117 хүний амь бие,  220 сая төгрөгийн эд хөрөнгийг авран хамгааллаа. Ослын дуудлагыг ангилвал: газар хөдлөлт 1,  ахуйн ослын 7, зам тээврийн ослын 6, аврах ажиллагааны 10, химийн бодис алдагдсан 3,  цогцос гаргах 5, амиа хорлох 2,  барилгын осол 2,  сум галт хэрэгслэл олдсон 2, дэд бүтэцтэй холбоотой 2  дуудлага байна.
Аюулт үзэгдэл, техникийн холбогдолтой ослын улмаас аж ахуйн нэгж байгууллага, иргэдэд 173,1 сая төгрөгийн хохирол учирч,   ахуйн ослоор 1 хүн, гал түймэрт  өртөж  4 хүн нийт  5 хүн нас барж,   7 хүн түлэгдэж,  ахуйн болон зам тээврийн осолд  бэртэж гэмтсэн  17 хүнд  эмнэлгийн анхан шатны тусламж үзүүлэн, 16 хүнийг эмнэлэгт хүргэж, 6 цогцосыг цагдаагийн байгууллагад шилжүүлсэн байна.

 Нийслэлийн хэмжээнд гарсан аюулт үзэгдэл, ослын  дуудлагыг дүүрэг тус бүрээр харуулбал  Сонгинохайрхан дүүрэгт 62 удаа, Баянзүрх дүүрэгт 73 удаа, Баянгол дүүрэгт 47  удаа,  Чингэлтэй дүүрэгт  21удаа, Сүхбаатар дүүрэгт 42 удаа, Хан-Уул дүүрэгт 20 удаа, Налайх дүүрэгт 16 удаа,  Багануур дүүрэгт  5, Багахангай дүүрэг 2 удаа тус тус гарсан  байна.
Гамшгийн дуудлагын тоог өнгөрсөн оны мөн үетэй харьцуулахад 6,6 хувиар өссөн байна. Гамшгийн  дуудлагын  85,7 хувь нь объектын гал түймэр эзлэж байна.

2013 оны 10 дугаар сарын гал түймрийн нөхцөл байдлыг өнгөрсөн оны мөн үетэй харьцуулахад объектын гал түймрийн дуудлагын тоо 7,8 хувиар, иргэд унтраасан гал түймрийн тоо  7,6 хувиар,  өөрөө унтарсан гал түймрийн тоо 2,6 дахин өсч, Аврах гал унтраах анги ажилласан галын тоо 0,6 хувиар  буурсан үзүүлэлттэй байна.