“Капитал” банкийг тойрсон элдэв маргаан хүрээгээ тэлсээр байна. Олон арван ажилчдаа хохироож байгаа “Капитал” банкны удирдлагуудын хүнд суртлыг шүүжлэх хүмүүс ч олширсоор байгаа юм. Бид та бүхэнд түрүүчийн удаа “Капитал” банкны удирдлагууд 80 гаруй ажилчдаа хохироож өдгөө заримыг нь орох оронгүй болгох дээрээ тулаад байгаа талаарх мэдээллийг хүргэж байсан. Тэд орон сууцаа өгөхгүй байгаа зарим ажилчдынхаа гэрлүү нь хүртэл хүн явуулж хаалга үүдийг нь эвдүүлж, цахилгааныг нь  салгуулж сар гаруй тоггүй байлгаж байсан. Эцэстээ зарим ажилчидтайгаа шүүхдэх дээрээ тулаад явж байгааг хэлэх нь зүйтэй болов уу. Тодруулж хэлбэл, өнгөрсөн хоёр жилийн хугацаанд “Капитал” банк “Шинэ дэлхий, “Би Энд Си”, “Катринг” гэсэн гурван компанид барилгын санхүүжилтийн зээл олгосон байдаг.  Тухайн үед барилгын компаниуд нь зээлээ аваад, барилгаа бариад явж байсан ч санхүүжилт нь багассан байгаа юм. Улмаар  зээлээ эргэж төлж чадахгүй, хугацаа хэтрээд, чанаргүй болоод ирж байхад нь  Монгол банкнаас “Капитал” банкинд шалгалт хийхээр болж. Тиймээс их хэмжээний зээл чанаргүйдээд ирэхээр банкны зохистой харилцаа алдагдана  гэдгийг тооцоолж асуудлыг аргалахын тулд ажилчдаараа бамбай хийсэн нь энэ. Барилгын зээлээ орон сууцны зээл болгож хувиргах арга зохиож байрны зээл авах сонирхолтой бүх хүнийг хамруулж, тэр ч битгий хэл дөнгөж ажилд ороод 2-3 сар болсон хүнд хүртэл боломж олгосон байдаг.  Гэвч эцэст нь ажилчид нь бизнесийнх нь золиос болоод байгаа юм.

Ямартаа ч энэ удаад орон сууцны зээлийн асуудлыг түр орхиж  тус банкны удирдлагууд ажилчидтайгаа ямар зүй бус гэрээ байгуулдаг талаарх мэдээллийг хүргэхээр бэлдлээ.
“Капитал” банкны ажилтан байсан Цэвэлмаа гэх эмэгтэйг жирэмсэн боллоо гэж ажлаас нь халсан төдийгүй байрыг нь хурааж авсан байдаг.  Тухайн үед зарим хүмүүс  эмэгтэй хүнийг жирэмслэлээ гэж ажлаас нь халаад бас байрыг нь хурааж авна гэдэг байж боломгүй зүйл гэж ярьж байсан. Гэвч энэ бүсгүй байгууллагын дотоод гэрээгээ зөрчсөн учир ингэж шийтгүүлсэн гэдгийг Хүний эрхийн үндэсний комиссоос баталлаа. Учир нь нийгмийн хариуцлагыг эрхэмлэгч уриатай энэ банкны удирдлагууд ажилчдынхаа эрх ашгийг ноцтой зөрчиж байсан нь ХЭҮК-оос хийсэн шалгалтаар илэрч, зөрчлөө арилгах шаардлагыг хүргүүлжээ.
Тодруулбал,  тус банкны ажилчдаас тавьсан хүсэлтийн дагуу ХЭҮК-оос ажлын хэсэг гарч банкинд шалгалт хийхэд Хөдөлмөрийн хууль, Хүний эрх зэргээр 13 зөрчил илрүүлсэн байна. Тиймээс ХЭҮК-оос “Капитал” банкны удирдлагуудад эдгээр зөрчлөө арилгах эсвэл сайжруулж, өөрчлөх шаардлагыг хүргүүлжээ.  Гэвч “Капитал” банкны удирдлага болоод хуулийн зөвлөх нь ХЭҮК-оос ирүүлсэн шаардлагыг үндэслэлгүй учир биелүүлэх боломжгүй гэдгээ дуулгажээ.

Тэд  эмэгтэй ажилчдаа анх ажилд ороход нь 2-3 жилийн хугацаанд жирэмслэхгүй гэсэн гэрээнд гарын үсэг зуруулдаг байна.  Хэрвээ ажилчин нь энэ хугацаанд жирэмсэлсэн тохиолдолд өөрийн хүсэлтээр ажлаас чөлөөлөгдөх ёстой аж. Мөн дээрээс нь ажлаас гарах хүртлээ авсан цалингийнхаа 50 хувийг банкиндаа эргүүлэн төлөх гэрээтэй.  Мэдээж бизнесийн чиглэлээр үйл ажиллагаа явуулж байгаа ямар ч байгууллага өөрийн гэсэн дотоод журамта, ажилчид нь түүнийг дагаж мөрдөж байдаг.  Гэхдээ 2-3 жил өөрийн байгуулагад үнэнчээр ажилласан ажилтнаа жирэмсэн гэх шалтгаанаар ажлаас нь чөлөөлж, олгож байсан цалингийнхаа 50 хувийг авах нь ёстой л хшүний эрхийг ноцтой зөрчиж байгаа хэрэг юм. Үүний цаана олон сөрөг нөлөөг ч бий болгож байгааг тэд тооцоолсонгүй. Адаглаад ажлаасаа гарахгүй гэсэн ажилчид нь үр хөндүүлж улмаар бие, сэтгэлээрээ хохирч байгаа шүү дээ.

Цаашлаад ХЭҮК-оос эхлээд хүний эрхийн төлөө гэсэн бүх байгууллагаас эднийх дээр шалгалт явуулах гэж байгаа аж. Мөн ажилчдаа хохироож буй энэхүү үйлдлийг хэдийд эцэслэн дарахыг олон нийт анхааралтай ажиглаж байна.
Үргэлжлэл бий