Шотландын зохиолч Роберт Луисын “The Bottle Imp” зохиолоос сэдэвлэсэн “Үхлийн симфони” адал явдалт аймшгийн кино энэ сарын 31 буюу Халловены баяраар нээлтээ хийхээр товоо зарлаад буй. Тэгвэл тус киноны уран бүтээлчид өнөөдөр мэдээлэл хийлээ.

Энэхүү дэлгэцийн бүтээлийг “Шинэ үе” продакшны жүжигчин Р.Алтансүх буюу Аси, “Оюунлаг” продакшны залуу уран бүтээлчидтэй хамтран бүтээжээ.

Ерөнхий найруулагч Аси “Архидалт нийгмийн өргөн хүрээг хамарч насны хувьд ч залуужиж байна. Дунд болон ахлах ангийнхан архийг ихээр сонирхож хэрэглэх болсон. Залуучууд өнөөдөр архи худалдан авахдаа цаана нь юуг давхар худалдан авч байгаагаа ойлгохгүй хөөрч дарвиж байгааг энэхүү киногоороо үзүүлэхийг зорьсон” гэв.
Үхлийн симфони киноны гол дүрд н.Мөнхтулга, н.Мөнххишиг зэрэг залуу уран бүтээлчид тоглосон бөгөөд ахмад уран бүтээлчдээс МУГЖ Мэндбаяр МУГЖ Цэрэндарьзав нар оролцон тогложээ.

Тус киноны уран бүтээлчдийн зүгээс үзэгчдэд нэгэн гэнэтийн бэлгийг барьж байгаа нь нээлтийн өмнө болох Халловены баярын арга хэмжээ юм.  Халловены баяр 12.00 цагаас эхлэх бөгөөд хүссэн хүн бүхэн сүнсний баярын хувцсаар гоён оролцох боломжтой. Энэ үеэр шилдэг айлгалт цочоолтын бичлэгүүдийг шалгаруулахаас гадна олон олон сюрпризээр үзэгч түмэндээ бэлэг барих гэнэ.

Баярын арга хэмжээний дараа буюу 15.00 цагаас Үхлийн симфони киноны нээлт болно. Тус киноны уран бүтээлчид Тэнгис кино театртай хамтран нээлтийн үеэр олсон бүх орлогоо өвчиндөө шаналж буй н.Мөнхзаяа охины эмчилгээний зардалд нэмэрлэх юм байна. 

Энэ жил дөнгөж хоёрхон настай н.Мөнхзаяа охин тархины эвэрхийтэй гэсэн оноштой. Тэрээр ээжтэйгээ Хөвсгөл аймгийн Хатгал сумаас ирсэн бөгөөд охин өсөж том болохын хэрээр нүүрэн дээрх ургацаг нь томорч, үзэгдэх орчин хязгаарлагдахаас гадна хамарт нь даралт өгснөөр амьсгалахад ч хүндрэлтэй байгаа юм. Охиныг монголд эмчлэх боломжгүй бөгөөд Солонгос улс руу хагалгаанд явуулахад 200 гаруй сая төгрөг шаардлагатай байгаа аж.