Өчигдөр  Монгол бөхийн өргөөнд болсон Архангай аймгийн Хайрхан сумын 90 жилийн ойн "Хайрханы хүчтэнүүд" барилдаанд улсын заан Ч.Санжаадамба түрүүлж улсын начин Б.Пүрэвсайхан үзүүрлэлээ.

Тус барилдаанд улс аймгийн алдар цолтой 224 бөх зодоглосон бөгөөд их шөвгийн дөрөвт Увс аймгийн Улаангом сумын харьяат “Увснуур” дэвжээний бөх улсын харцага Ө.Бат-Орших, Ховд аймгийн Чандмань сумын харьяат Ховд дэвжээний бөх улсын начин Ч.Цогбаяр нар шалгарчээ.

Хайрхан сумаас Даян аварга Ц.Чимэд-Очир, улсын арслан "суудаг" хэмээх Ц.Содов, "аат" хэмээх Д.Лувсанжамц, улсын заан "мөнгөн" хэмээх Б.Балдир, улсын начин Л.Банзар, Г.Халзан, Д.Тавинтай, Б.Түдэв, Ж.Хөхөө, Н.Дэндэв, М.Даш нарын улсын алдар цолтой бөхчүүд  төрөн гарчээ. Хайрхан сумынхан сумаасаа төрөн гарсан дээрх бөхчүүдийн үр хүүхдүүд болон аймаг сумын цолтой бөхчүүддээ хүндэтгэл үзүүлэв.

Барилдааны хоёрын даваанд улсын начин Л.Гантулга сумын заан Дундговийн Э.Дашд өвдөг шороодсоныг эс тооцвол улсын цолтнууд бүгд хоёр давсан юм.