Дэлхийн сонгодогуудын тоонд зүй ёсоор багтдаг Испанийн алдарт зохиолч Мигель Сервантесын “Кихот ноён” жүжгийг Драмын эрдмийн театрын уран бүтээлчид энэ сарын 8-нд тоглохоор товоо зарлаад буй. Тэгвэл тус жүжгийн уран бүтээлчид өнөөдөр шинэ бүтээлийнхээ талаар мэдээлэл хийлээ.

Хэрэн хэсүүчлэгч, хүлэг баатар Дон Кихот, түүний зарц Санчо Панса нарын тухай өгүүлэх тус жүжгээр УДЭТ шинэ үзвэрийн жилийн нээлтээ хийж байгаа юм. Жүжгийн ерөнхий найруулагчаар Урлагийн Гавъяат зүтгэлтэн  Б.Баатар ажиллаж байгаа бөгөөд тэрээр энэ жүжгийнхээ дүрүүдийг их эртнээс сонгожээ.

Тэрээр энэ тухай "Би Кихот ноёнд тоглох хүн, Санчо Пансад тоглох хүн манай эрдмийн театрт байгаа билүү гэдгийг  бодсон. Хэрэв жүжигчин нь байгаагүй бол би ямар алдар нэрэнд дурлаад гайхуулж байгаа биш энэ жүжгийг тавихгүй. Би тав зургаан жилийн өмнөөс Жагааг Кихотод тоглуулахаар сонгосон" гэж байлаа.

Түүний хэлснээр удахгүй нээлтээ хийх "Кихот ноён" жүжгийн Дон Кихотын дүрийг ард олноо Хасар Жагаа нэрээрээ алдаршсан Гавьяат жүжигчин Б.Жаргалсайхан бүтээж байгаа бол үнэнч зарц Санчо Пансагийн дүрийг СТА жүжигчин Г.Амгаланбаатар тайзнаа амилуулах аж.