Жирэмсэн эмэгтэйчүүд хэвлий дахь ургаа хил дамнуулан худалдаалдаг талаарх мэдээлэл гарч хүмүүсийг цочроох болсон. Тэгвэл энэ талаар ЦЕГ-ын хэвлэл мэдээллийн байцаагч, цагдаагийн ахмад Ё.Лхагвасүрэнгээс тодруулахад “ Хятадад хүүхдээ аваачиж зардаг гэх мэдээлэл байгаа. Гэвч гадны улсад үйлдэгдсэн гэмт үйлдлийг эрүүгийн хуулийн зүйлчлэлээр шалгах эрх бидэнд байхгүй.  Тухайн улсад үйлдэгдсэн гэмт хэрэг тухайн улсын эрүүгийн хуулиар шийдэгдэнэ. Тэгэхээр үүнийг шалгах ямар ч үндэслэл Харин энэ гэмт үйлдлийн анхны үүсвэр нь хаана юм бэ гэдгийг тогтоож болно. Тэр хүн өөрөө сайн дураараа хүүхдээ зарсан уу, бусад хүмүүс зуучилж заруулж байна уу гэдгийг бас шалгах ёстой. Хилтэй холбоотой, хил давж үйлдэгдэж байгаа хэрэг учир Тагнуулын ерөнхий газар харьяаллын дагуу шалгах учиртай. Гэвч одоогоор энэ хэргийн талаар шалгаж байгаа гэх мэдээлэл байхгүй байна” гэв.

Харин зарим эх сурвалжийн мэдээлж буйгаар Хил хамгаалах ерөний газар энэ хэрэг дээр ажиллаж байгаа. Мөн ХЭҮК-оос ажлын хэсэг гаргаж яаралтай арга хэмжээ авахаар ажиллаж байна ч гэх мэдээлэл байна.  Тиймээс ХЭҮК-ийн Ахлах референт Б.Батаагаас энэ асуудлын хүрээнд зарим зүйлийг тодрууллаа.

-Бид энэ талаарх мэдээллийг сонссон. Гэвч манайд ямар нэг гомдол, санал ирээгүй байна. Хууль хяналтын байгууллагынхан шалгаж байгаа эсэхийг үгүйсгэхгүй юм.

-Үнэхээр эмэгтэйчүүд хүүхдээ Хятадад зарсан тохиолдол үнэн бол энэ асуудал хүний эрхийг зөрчиж байгаа үйлдэл мөн үү?
-Хүний эрхийг зөрчсөн төдийгүй маш том гэмт хэрэг болно. Ер нь хил дамнуулан хүн худалдаалах, хүний наймаа бол цэвэр гэмт хэрэг. Үндэстэн дамнасан хүний наймаатай тэмцэх конвецид манай улс нэгдэж орсон байгаа. Ингээд хүн худалдаалах чиглэлээр тодорхой ажлыг зохион байгуулах ёстой юм. Энэ дагуу хуулийн байгууллага ажилладаг. 2008 оноос хойш тодорхой төлсийн хүрээнд хуулийн байгууллагууд манайтай хамтраад маш олон ажлыг хийсэн. Үүний үр дүн бол хүүхдийг гадагшаа гарахад гадаад паспорт олгосон явдал юм. Өмнө нь бол цагаан хуудас, хавсралтаар ордог байсныг та бүхэн санаж байгаа байх. Хавсралтаар ийн гарч байгаа тохиолдолд ямар нэг зөрчил гарч магадгүй гэж үзсэн. Ингээд паспорттой болгосноор тухайн хүүхдийн бүх судалгаа гарч ирдэг болсон. Хилээр хэн нэгэн хүүхдийг худалдаалах замаар гаргаж байвал энэ нь гэмт хэрэг болж эрүүгийн журмаар шийдэгдэнэ.

-Яг ургаа зарж буй гэх тохиолдлын талаар өмнө ч гомдол ирж байгаагүй юу?
-Саяхан Монголын үндэсний телевизээр хилээр монгол эмэгтэй гадагшаа гарахдаа жирэмсэн гараад улмаар буцаж ирэхдээ хүүхэдгүй ирсэн талаарх нэвтрүүлэг гарсаныг л мэдэж байна. Түүнээс биш манайд яг ийм гомдол ирж байгаагүй. Харин хүний наймаатай холбоотой асуудал бол яригддаг. Гэвч Хүний эрхийн комисс хуулийн байгууллагын үйл ажиллагаанд хөндлөнгөөс оролцохгүй. Хууль сахиулах үйл ажиллагаа явдгаараа явна. Хууль сахиулах үйл ажиллагаа явахдаа хүний эрхийг зөрчих асуудал яригдвал бидний зүгээс асуудлыг тусгадаг.
Хохирогчийн аюулгүй байдал, эрхийн асуудлыг бид хөндөж тавина.  Гэрч, хохирогчийг хамгаалах эрхзүйн орчин бүрдүүлэх талаар ажилладаг.

-Хэрэв хятадад үнэхээр энэ гэмт үйлдэл гарсан гэх гомдол танайд ирвэл ямар арга хэмжээг авах вэ?
-Гомдол ирвэл бид цагдаагийн байгууллагад шилжүүлнэ. Хуулийн журмаар шалгах гэмт хэрэг учир цагдаагийн байгууллагад шилжүүлэх юм. Хууль сахиулах үйл ажиллагааг ХЭҮК хэрэгжүүлэхгүй. Бид хууль сахиулах байгууллагад шилжүүлэхэд тухайн байгууллагад хохирогчийн эрхийг хамгаалах механизми ажлаад явж байх хэрэгтэй. Хохирогчийн эрхийг хамгаалж, аюулгүй байдал ажиллаж чадаж байна уу гэдэн асуудал яригдвал бид хохирогчийн эрхийн байр суурьнаас оролцох боломжтой.