Манай улс дахь НҮБ-ын Хүүхдийн сангийн санаачилгаар хүүхдийн хүчирхийллийн эсрэг “Нүдээ нээе” нэртэй нэгэн сайхан уран бүтээл төрөн гарах гэж байна. Энэ дууг монголын рок попын төлөөлөл болсон 20 гаруй уран бүтээлчид хамтран дуулж байгаа бөгөөд энэхүү дууг дуулах рок попын одуудын уулзалт арга хэмжээ өчигдөр НҮБ-ийн төв-д боллоо.

Энэ дууны үгийг “Рок” нэрээрээ олонд танигдсан Р.Мөнхсайхан бичиж, гитарчин Өөжгий аяыг нь зохиожээ. Түүнчлэн “Нүдээ нээе” дууг бүтээхэд МУГЖ Алтанцэцэг болон “Prosound” студийн хамт олон ихээхэн хувь нэмрээ оруулж бай

Энэ талаар МУГЖ Н.Алтанцэцэг “Одоогоос хоёр сарын өмнө манай Просаунд студид НҮБ-ын Хүүхдийн сангийн суурин төлөөлөгч ноён Мохамед Фолл ажилтнуудынхаа хамтаар ирж санал тавьсан. Би өөрийгөө монголын урлагийнхан дундаа хүүхдийн төлөө за гэж дугарч, хоёр гараа өргөдөг уран бүтээлчдийн нэг гэж бодож явдаг. Тийм учраас энэ саналыг маш сайхан хүлээн авч хүрэлцэн ирсэн хамтлаг дуучиддаа баярлалаа. Монголчууд маань эрт дээр үеэс хүүхдүүдээ 1-8 нас хүртэл бурхан гэж дээдэлдэг байсан тэр сайхан уламжлал өнөө цагт алдагдаж хүүхдийн эсрэг гэмт хэрэг ихээр гарч байна. Энэ байдлыг уран бүтээлчид бид өөрчилж, хар бараан зүйлийн дунд гэрэл гэгээ татуулах эрх үүрэгтэй хүмүүс. Тиймээс л энэ бүтээл дээр ханцуй шамлан орсон юм. Өнөөдөр би энэ дууныхаа демо буюу хамгийн анхны байдлаар сонсгох гэж байна. Энэ бол яг төгс бичлэг биш. Ер нь ийм үгтэй ийм дуу болж байгаа гэдгийг та бүхэнд сонирхуулахыг хүссэн юм. Тэгээд хүүхдийн бурхан биднийг ивээх болтугай. Бас урлагийн тэнгэр Янжинлхам бурхан энэ уран бүтээлийг минь ивээж маш сайхан дуу болноо гэдэгт итгэлтэй байна” гэлээ.

Тус арга хэмжээнд энэ дууг хамтран дуулсан зарим уран бүтээлчид хүрэлцэн ирсэн нь дуучин Агиймаа, А Sound хамтлагийн ахлагч Тэмүүлэн, Fire хамтлагийн дуучин Далай нар байсан юм. Дашрамд сонирхуулахад "Нүдээ нээе" дуу энэ сарын 20-нд болох Хүүхдийн эрхийн конвенцийн өдөр болох томоохон арга хэмжээний үеэр нээлтээ хийх юм байна.